Հայ երիտասարդության մտավոր փոխգործակցության ընկերակցության (ՍԻՎԱՄ) Քննարկման ակումբի նիստը «Հայերն ու հրեաները` եղբայրաբա՞ր, թե՞ խելքով» թեմայով տեղի կունենա հոկտեմբերի 17-ին Մոսկվայում Հայաստանի դեսպանատանը: Այդ մասին հաղորդում է ՍԻՎԱՄ-ի մամլո ծառայությունը:
«Քննարկման շրջանակներում մենք կփորձենք պարզել, թե ինչու մեր պատմությունների, ազգային մտածելակերպի և այլ գործոնների ընդհանրության դեպքում հայերն ու հրեաները կյանքի, սփյուռքի ձևավորման, բիզնեսի, պետության հանդեպ սկզբունքորեն տարբեր մոտեցումներ են քարոզում»,- ասվում է հաղորդագրության մեջ:
Երկու ընդդիմադիր խոսնակներ` Արմեն Բեկլարյանն ու Աննա Էլչյանը, կներկայացնեն իրենց ելույթները և վայրկենաչափների օգնությամբ կփորձեն լսարանին համոզել իրենց դիրքորոշման իրավացիության հարցում:
Մասնակիցները կարող են արտահայտել իրենց դիրքորոշումը, ինչպես նաև հարցեր տալ խոսնակներին ու փորձագետներին:
«ՍԻՎԱՄ-ը զգուշացնում է, որ քննարկման ընթացքում ցանկացած ազգայնական, վարկաբեկող, շովինիստական արտահայտություններ ու մեկնաբանություններ անհապաղ կանխվելու են, իսկ մեղավորները հեռացվելու են լսարանից»,- ասվում է հաղորդագրության մեջ:
