ԼՂՀ նախագահ Բակո Սահակյանը հոկտեմբերի 18-ին ստորագրել է հրամանագիր Արցախի Հանրապետության պետական պարգեւներով պարգեւատրելու մասին:
Բարեգործական մի շարք ծրագրերի իրականացման համար եւ Հայ օգնության միության 100-ամյա հոբելյանի կապակցությամբ «Վաչագան Բարեպաշտ» մեդալով պարգեւատրվել է Հայ օգնության միության կենտրոնական վարչությունը, «Երախտագիտություն» մեդալով՝ Հայ օգնության միության Արցախի մեկուսի մասնաճյուղը:
Արցախի Հանրապետության նախագահը նույն օրը մասնակցել է Ստեփանակերտի երիտասարդության պալատում Հայ օգնության միության 100-ամյա հոբելյանին նվիրված հանդիսավոր միջոցառմանը: Երկրի ղեկավարը պետական պարգեւներ է հանձնել ՀՕՄ-ի կենտրոնական եւ Արցախի շրջանային վարչությունների անդամներին, հայտնում է Արցախի Հանրապետության նախագահի աշխատակազմի տեղեկատվության գլխավոր վարչությունը:
