«Մենք բաց նամակով դիմել ենք Հայաստանի բոլոր ատյաններին, ինչպես նաև «Աշխարհագրության մեծ պատկերազարդ հանրագիտարանի» խմբագրություն՝ խնդրելով վերանայել հանրագիտարանում զետեղված տեղեկությունները»,-հոկտեմբերի 21-ին կայացած մամլո ասուլիսում հայտարարել է «Անկախ» շաբաթաթերթի խմբագիր Վարդուհի Իշխանյանը:
Նա նշել է, որ Երևանի գրախանութներում վաճառվում է «Աշխարհագրության մեծ պատկերազարդ հանրագիտարանը», որտեղ ասվում է, թե Հայաստանում հիմնական լեզուներն են հայերենն ու ադրբեջաներենը, իսկ հիմնական կրոնը ուղղափառությունն է (Հայ առաքելական եկեղեցի) և իսլամը (շիաներ): Հանրագիտարանը նաև կեղծ տեղեկություններ է պարունակում ղարաբաղյան հակամարտության մասին: Մասնավորապես, Արցախն այնտեղ ներկայացված է որպես «Ադրբեջանի պատմական տարածք, որը հիմնականում բնակեցված է հայերով»:
Այդ կապակցությամբ Վարդուհի Իշխանյանն ու լրագրող Անի Գասպարյանը կոչ են արել հանրությանը իրենց վրդովմունքն ու բացասական վերաբերմունքը հայտնել այս երևույթի հանդեպ:
