«Եթե Հայաստանի նախագահ Սերժ Սարգսյանն Աստրախանում Ադրբեջանի նախագահ Իլհամ Ալիևի հետ հանդիպումից հետո մեզ առաջարկի ճանաչել ԼՂՀ անկախությունը, ապա մենք մեծ հաճույքով կանենք դա»,- ՀՀ ԱԺ-ում լրագրողների հետ հանդիպման ժամանակ, պատասխանելով այն հարցին, թե ինչպիսի ազդեցություն կարող է ունենալ Հայաստանի ու Ադրբեջանի նախագահների հանդիպումը «ԼՂՀ անկախության ճանաչման մասին» «Ժառանգություն» կուսակցության օրինագծի վրա, հայտնել է Հայաստանի խորհրդարանի խոսնակ Հովիկ Աբրահամյանը:
Աբրահամյանի խոսքով, եթե Հայաստանի նախագահի գլխավորությամբ որոշում ընդունվի ԼՂՀ անկախությունը ճանաչելու մասին, ապա քաղաքական մեծամասնությունը կարող է անհապաղ նման օրինագիծ առաջադրել և ընդունել այն: «Թող այնպիսի տպավորություն չստեղծվի, որ ՀՀԿ-ն չի ցանկանում ճանաչել Արցախի անկախությունը: Մենք պարզապես չենք ցանկանում խանգարել բանակցային գործընթացին»,- նկատել է նա: