«Վայոց ձորի մարզի համար այժմ որպես զբոսաշրջային բրենդ է ծառայում Նորավանքը, սակայն մենք նպատակ ունենք զբոսաշրջային համալիր ստեղծել Եղեգիս ավանի մոտ, որտեղ երեք եկեղեցի կա: Երրորդ փուլը կլինի Գնդեվանքի հետ կապված ծրագիրը: Այս ամենի համար հսկայական միջոցներ են հարկավոր և անմիջապես լուծել այս խնդիրը հնարավոր չէ, սակայն մենք ջանում ենք աստիճանաբար վերականգնել մարզի պատմությունն ու ներկայացնել այն աշխարհին»,-ասել է Վայոց ձորի մարզպետ Սերգեյ Բագրատյանը:
Պատասխանելով PANARMENIAN.Net-ի թղթակցի հարցին, նա ասել է, որ մարզում նպատակահարմար է զարգացնել էկոտուրիզմը, որպեսզի միջամտությունը բնությանը նվազագույն լինի: «Մենք հյուրանոցների ու համապատասխան ենթակառուցվածքների պակաս ունենք: Մարզում ձիաբուծությունը զարգացնելու մտադրություն կա՝ հետագայում ձիարշավներ կազմակերպելու համար»,-հավելել է նա:
Ինչ վերաբերում է ագրոտուրիզմին, ապա մարզպետն ասել է, որ դա դեռևս հեռանկարում է, քանի որ այս պահի դրությամբ անհրաժեշտ միջոցներ չկան:
