Դեկտեմբերի 1-ին Մոսկվայում տեղի է ունեցել ՀԱՊԿ անդամ պետությունների Արտակարգ իրավիճակների համակարգող խորհրդի նիստը ՌԴ ԱԻՆ ղեկավար Սերգեյ Շոյգուի նախագահությամբ:
Նիստին մասնակցել է նաև ՀՀ Արտակարգ իրավիճակների նախարար Արմեն Երիցյանը: Նիստին քննարկվել է արտակարգ իրավիճակների արձագանքման միասնական մեխանիզմի ստեղծման հարցը: Միջոցառումների ծրագիրը պատրաստ է, համաձայնեցված է և կհաստատվի ՀԱՊԿ Խորհրդի նիստում դեկտեմբերի 10-ին:
Այդ փաստաթուղթը կդառնա առաջիկա 2 տարվա ծրագրային փաստաթուղթը:
Նիստում նշվել է, որ ՀԱՊԿ հավաքական ուժերի կիրառման մեխանիզմը արտակարգ իրավիճակների արձագանքման հարցում քիչ արդյունավետ է և հարկավոր է մշակել այնպիսի կարգ, որը թույլ կտա առավելագույնս կրճատել ժամանակը հարցումից մինչև ուժերի ժամանումը տուժած տարածաշրջան, հաղորդում է ՌԴ ԱԻՆ մամլո ծառայությունը:
