Ադրբեջանը բանակցային գործընթացի քողի տակ փորձում է քարոզչական եւ տեղեկատվական պատերազմ իրականացնել Հայաստանի դեմ, հայտարարել է ՀՀ ԱԳ փոխնախարար Շավարշ Քոչարյանը՝ մեկնաբանելով Աստանայում կայացած ԵԱՀԿ գագաթնաժողովի արդյունքները: Ըստ նրա, մեր լրատվական դաշտի որոշակի հատված, առանձին վերլուծաբաններ եւ նույնիսկ քաղաքական ուժեր դարձել են այդ քարոզչության եւ ապատեղեկատվության պատանդ: «Կարծում եմ, որ ոչ թե պետք է հավատալ ադրբեջանական հայտարարություններին` միապաղաղ, միանման, այլ ավելի ուշադիր լինել դեպքերի զարգացումներին եւ վերլուծել այն, ինչ իրականում տեղի է ունենում»,-ասել է փոխնախարարը՝ անդրադառնալով գագաթնաժողովից առաջ հնչած որոշ խուճապահար հայտարարություններին, հաղորդում է ԱԳՆ մամլո ծառայությունը: