ՎիվաՍել-ՄՏՍ-ը` «ՄՏՍ» ԲԲԸ դուստր ձեռնարկությունը, հայտարարում է հատուկ կարիքներ ունեցող ծնողազուրկ և սոցիալապես անապահով ընտանիքներում ապրող առաջին և երկրորդ կուրսի ուսանողների կրթաթոշակային աջակցության ծրագրի մեկնարկի մասին: Ընկերությունը մինչև ուսման ավարտը պատրաստ է օժանդակել այդ ուսանողներին, պայմանով, որ նրանք հաջողությամբ ավարտեն ակադեմիական տարին և փոխադրվեն հաջորդ կուրս:
Կրթաթոշակային այս աննախադեպ ծրագիրը նպատակ ունի ուսուցման ամբողջ ժամանակահատվածում ուսման վարձը հատուցելով` կրթությունը հասանելի դարձնել խոցելի խմբերում ընդգրկված այդ ուսանողներին: Այս ծրագիրը նրանց կքաջալերի նոր ձգտումների և հմտությունները կատարելագործելու հարցում` նաև բարելավելով սոցիալական և հոգեբանական վիճակը:
«Կրթաթոշակ կտրամադրվի ամենախոցելի ընտանիքներում ապրող 150 երիտասարդի` ապահովելով նրանց կրթությունը: Այս նախաձեռնությունն իրականացվում է` խոցելի խմբի երիտասարդ սերնդին մասնագիտական գիտելիքներ և հմտություններ տրամադրելու և այդ կերպ նաև` երկրում աղքատությունը հաղթահարելու նպատակով», -ասաց ՎիվաՍել-ՄՏՍ-ի գլխավոր տնօրեն Ռալֆ Յիրիկյանը:
Ընդհանուր առմամբ նախագծից կօգտվի 150 ուսանող` Երևանից և հեռավոր մարզերից:
