Գյուղատնտեսության նորանշանակ նախարար Սերգո Կարապետյանն իր աշխատանքային առաջին օրը սկսեց նախարարության ընթացիկ խնդիրների և անելիքների, ինչպես նաև աշխատակազմի հետ ծանոթությամբ: Օրը նշանավորվեց նաև խորհրդանշական իրադարձությամբ. պարոն Կարապետյանը ստորագրեց իր առաջին հրամանը` գյուղատնտեսության նախարարի գլխավոր խորհրդական Միխայիլ Գրիգորյանին ոսկե մեդալով պարգևատրելու մասին: «Հայաստանի Հանրապետության գյուղատնտեսության նախարարության բնագավառում երկարամյա աշխատանքի և մեծ ավանդի համար Հայաստանի Հանրապետության գյուղատնտեսության նախարարի գլխավոր խորհրդական Միխայիլ Սամսոնի Գրիգորյանին պարգևատրել Հայաստանի Հանրապետության գյուղատնտեսության նախարարության«Գյուղատնտեսական նվաճումների համար» ոսկե մեդալով»,- ասվում է հրամանում:
Հանձնելով բարձր պարգևը` նախարարը նաև շնորհավորեց պարոն Գրիգորյանին` ծննդյան օրվա կապակցությամբ և մաղթեց պահպանել աշխատանքային եռանդը` շարունակելով իր ավանդն ու հարուստ փորձը բերել մեր երկրի շենացմանն ու առաջընթացին, հաղորդում է նախարարության մամլո ծառայությունը:
