Հայաստանի վարչապետը հանձնարարել է վերանայել կրթական հաստատությունների հավատարմագրման կարգը
Փետրվարի 15-ին Հայաստանի կառավարությունում տեղի է ունեցել «Մասնագիտական կրթության որակի ապահովման ազգային կենտրոն» (ՈԱԱԿ) հիմնադրամի հոգաբարձուների խորհրդի նիստ, որը վարել է վարչապետ, հոգաբարձուների խորհրդի նախագահ Տիգրան Սարգսյանը: Վարչապետը երկրի կրթության և գիտության նախարար Արմեն Աշոտյանին ու հիմնադրամի տնօրենին հանձնարարել է համատեղ վերանայել և վերամշակել ՀՀ կրթական հաստատությունների ինստիտուցիոն և ծրագրային հավատարմագրման կարգը:
Ինչպես հաղորդում է ՀՀ կառավարության մամլո ծառայությունը, խորհրդի նիստում, նկատի ունենալով ՀՀ ֆինանսների նախարարի դիտողությունները, ընդունվել է «Մասնագիտական կրթության որակի ապահովման ազգային կենտրոն» հիմնադրամի 2011թ. բյուջեի նախահաշիվը:
