Ընդդիմադիր Հայ ազգային կոնգրեսի (ՀԱԿ) կազմակերպված ցույցը, որը նվիրված է 2008 թվականի մարտի 1-2-ի ողբերգական դեպքերի 3-րդ տարելիցին, ներկայումս ընթանում է Երևանի կենտրոնում` Մատենադարանի շենքի դիմաց: Ինչպես հաղորդում է PanARMENIAN.Net-ի թղթակիցը դեպքի վայրից, ցույցը մեկնարկեց Հայկական Համազգային շարժման (ՀՀՇ) վարչության նախագահ Արամ Մանուկյանի խոսքով: Նա հայտարարեց, որ ՀԱԿ-ը սկսում է ցույցերի շարքը, որոնք ուղղված են արդարության վերականգնմանն ու արտահերթ ընտրությունների անցկացմանը:

Մոտավոր գնահատմամբ, ցույցին մինչև 10 հազար մարդ է մասնակցում: Տեղեկություններ կան, որ նախքան ցույցը ոստիկանության աշխատակիցների և ցույցի մասնակիցների միջև բախումներ են տեղի ունեցել: ՀԱԿ անդամ Դավիթ Շահնազարյանն այդ առիթով նշեց, որ նման միջադեպերը տեղի են ունեցել ցույցի մեկնարկից մեկ ժամ առաջ:

Մատենադարանի շենքի դիմաց ոստիկանության ամրացված ջոկատներ են կանգնած:

2008 թվականի փետրվարի 20-ից հայկական ընդդիմությունը` Հայաստանի առաջին նախագահ Լևոն Տեր-Պետրոսյանի գլխավորությամբ, որն առաջադրվել էր նախագահական ընտրություններում և պարտվել, Երևանի կենտրոնում ցույցեր էին անցկացնում` իրոնց դժգոհությունը հայտնելով քվեարկության արդյունքների վերաբերյալ: Մարտի 1-2-ին ընդդիմության բողոքի ցույցերը վերածվեցին անկարգությունների, որոնց արդյունքում մոտ 200 մարդ տուժեց, տասը զոհվեցին, ավելի քան 100 մարդ ձերբակալվեց: