Հիփոթեքային շուկայում հետճգնաժամային շրջանում ակտիվացում է նախատեսվում, իսկ իջեցված կանխավճարով նոր պրոդուկտի ներմուծումից հետո Հայաստանի Հիփոթեքային շուկայի մասնակիցների ասոցիացիան (ՀՀՇՄԱ) 2014 թվականին հիփոթեքային պորտֆելի ծավալի կրկնակի աճ է ակնկալում: Այդ մասին մարտի 2-ին Երևանում նոր հիփոթեքային պրոդուկտի ներկայացման ժամանակ ասել է ՀՀՇՄԱ գործադիր տնօրեն Գևորգ Բոսնոյանը: Նրա խոսքով, այսօրվա դրությամբ վարկային հիփոթեքային պորտֆելը կազմում է մոտ 97 մլրդ դրամ, իսկ 2014-ին աճ է սպասվում մինչև 180 մլրդ դրամ:

Գևորգ Բոսնոյանը հաղորդել է, որ 2010 թվականին Հայաստանում մոտ 4000 հիփոթեքի գործարք է կնքվել, ինչը 2009 թվականի ցուցանիշից 15%-ով բարձր է: Իսկ ինչ վերաբերում է հիփոթեքային վարկի միջին շուկայական դրույքներին, ապա նա ասել է, որ այսօր դրանք միջին հաշվով կազմում են 12%-13% և մոտակա երկու տարիներին դրանց զգալի փոփոխություն չի սպասվում: Դրա հետ մեկտեղ նա ավելացրել է, որ այդ երկու տարվա ընթացքում ՀՀՇՄԱ-ն կաշխատի հիփոթեքային վարկի կանխավճարի չափի նվազեցման և դրա ժամկետների երկարացման ուղղությամբ: