Շուրջ 1,5 հազար մարդ է մասնակցել Աջարիայի մայրաքաղաք Բաթումում տեղի ունեցած բողոքի ցույցին ընդդեմ վրաց-թուրքական նախապատրաստվող համաձայնագրի պատմական Ազիզե մեջիթի վերականգնման մասին, որը քանդվել է նախորդ դարի կեսերին, հայտնում է «Ազատություն» ռադիոկայանը:
Արդեն մի քանի տարի է ինչ Վրաստանի ու Թուրքիայի իշխանությունները ինտենսիվ բանակցություններ են վարում Աջարիայում պատմական մեջիթների վերականգնման շուրջ: Փոխարենը պաշտոնական Անկարան պատրաստ է համաձայնվել բյուզանդական դարաշրջանի վրացական եկեղեցիների վերականգնմանն իր տարածքում:
Սակայն Վրաց ուղղափառ եկեղեցին կտրականապես դեմ է հանդես եկել մեջիթների վերկանագնմանը: Ակցիայի մասնակցիները Բաթումում համակարծիք են պատրիարքի հետ և նամակ են հղել իշխանություններին, որտեղ ասվում է, որ իրենք անթույլատրելի են համարում մեջիթի կառուցումը Բաթումում: Ընդ որում, Թուրքիայի պահանջները կոչվել են վերջնագիր:
