Այս տարի յոթերորդ անգամ կանցկացվի ՏՏ ոլորտում ՀՀ նախագահի ամենամյա կրթական պարգևի մրցանակաբաշխությունը։ Այս մասին հայտնել է «Սինոփսիս Արմենիա» ընկերության հասարակության հետ կապերի բաժինը։Սույն թվականի մայիսի 12-ին, ժամը 14:30-ին Հայաստանի պետական ճարտարագիտական համալսարանում (ՀՊՃՀ) տեղի կունենա ՏՏ ոլորտում ՀՀ նախագահի ամենամյա կրթական պարգևի մրցանակաբաշխության հանձնաժողովի ամենամյա հանդիպումը մրցանակաբաշխության հավակնորդների հետ:
Մրցանակաբաշխության հիմնական նպատակը տեղեկատվական տեխնոլոգիաների ասպարեզում լավագույններին ճանաչելն ու խրախուսելն է:
Պարգևները շնորհվում են բարձր առաջադիմություն ունեցող այն ուսանողներին, ովքեր ակտիվորեն մասնակցում են սոցիալական ծրագրերին, տարբեր օլիմպիադաների և մրցույթների, գիտական հոդվածների հեղինակներ են, ունեն բազմակողմանի գիտելիքներ ու այլ տաղանդներ:
2011թ-ին նախատեսված են հետևյալ անվանակարգերը՝ Գլխավոր մրցանակ, Լավագույն ասպիրանտ (I և II կարգեր), Լավագույն մագիստրանտ (I և II կարգեր), Լավագույն բակալավր (I և II կարգեր), Լավագույն սփյուռքահայ մասնակից, Լավագույն ուսանողուհի, Լավագույն աշակերտ։
Նախագահական ամենամյա մրցանակաբաշխությունը ֆինանսավորում է Սինոփսիս Արմենիա ընկերությունը:
Մրցանակաբաշխությունն առաջին անգամ անցկացվել է 2005թ-ին։ Անցած 6 տարիների ընթացքում 158 ուսանող և աշակերտ արժանացել են այս պարգևին:
