Եվրախորհրդարանի նախագահ Եժի Բուզեկը Երևանում կայացած մամլո ասուլիսում այդպես էլ չներկայացրեց իր դիրքորոշումը Լեռնային Ղարաբաղ կատարվող մասնավոր այցերի առնչությամբ: Այն հարցին, թե ինչպես է ինքը գնահատում մարդու իրավունքների հետ կապված իրավիճակն ուսումնասիրելու նպատակով մասնավոր անձանց այցերը Ղարաբաղ, Բուզեկը հայտնել է, որ եթե հարցը վերաբերում է մարդու իրավունքներին, հումանիտար, սոցիալական օգնությանը, ապա անհրաժեշտ է ձեռնարկել բոլոր միջոցները այդ իրավունքների ապահովման համար: «Մարդու համար ամենակարևորն իր կյանքն ու բարեկեցիկ ապրելու հնարավորությունն է: Մարդկանց հումանիտար օգնությունն ու սոցիալական ապահովությունը կարևոր է և կապված չէ քաղաքականության հետ»,- նշել է Եժի Բուզեկը:
Ավելի վաղ ադրբեջանական լրատվամիջոցները հաղորդել էին, որ Եժի Բուզեկը, իբր, հայտնել է, թե մասնավոր այցերը Ղարաբաղ չեն նպաստում հիմնախնդրի կարգավորմանը:
