Մայիսի 18-ին Հայաստանի Ոստիկանության պետ, ոստիկանության գեներալ-լեյտենանտ Ալիկ Սարգսյանն ընդունեց Հայաստանի Հանրապետությունում ԱՄՆ-ի արտակարգ և լիազոր դեսպան Մարի Յովանովիչին և նրան ուղեկցող անձանց:
Ողջունելով բարձրաստիճան հյուրին` Ալիկ Սարգսյանը գոհունակությամբ նշեց, որ Մարի Յովանովիչի պաշտոնավարման շրջանում համագործակցությունը ՀՀ ոստիկանության հետ առավել ընդլայնվել ու խորացել է, ինչն իր արտահայտությունն է գտել հատկապես համակարգում ընթացող բարեփոխումների ոլորտում, որտեղ զգալի է ամերիկյան գործընկերների օժանդակությունը:
Մարի Յովանովիչը, ում պաշտոնավարման ժամկետը շուտով ավարտվում է, շնորհակալություն հայտնեց արդյունավետ համագործակցության համար և հավաստիացրեց, որ գործընկերությունը ՀՀ ոստիկանության հետ, մասնավորապես` աջակցությունը Հայաստանի ոստիկանության բարեփոխումների ընթացքին, շարունակական կլինի, հաղորդում է ՀՀ Ոստիկանության մամլո ծառայությունը:
