Իրանը փորձում է միաժամանակ սիրաշահել և Հայաստանին, և Ադրբեջանին: «Ղարաբաղյան խնդիրը Հայաստանում և միջազգային հարթակում. նոր իրավիճակ, հին մոտեցումներ» սեմինար-քննարկման ժամանակ նման կարծիք է հայտնել Ռազմավարական և ազգային հետազոտությունների հայկական կենտրոնի տնօրեն Մանվել Սարգսյանը:
«Իրանի հոգևոր առաջնորդի ներկայացուցչի հայտարարություններից հետո այնպիսի տպավորություն է ստեղծվել, որ Թեհրանը փորձում է սիրաշահել Հայաստանին և Ադրբեջանին և միևնույն ժամանակ հակազդել Թուրքիային: Հայաստանում Իրանի դեսպանատան հրապարակած հայտարարությունը, որտեղ ասվում է Թեհրանի կողմից ազգերի ինքնորոշման իրավունքը հարգելու և այն մասին, որ Իրանը դեմ է տարածաշրջանում արտասահմանյան զորքերի տեղակայմանը, հենց այդ մասին էլ վկայում է»,- ասել է փորձագետը:
Մանվել Սարգսյանը համոզված է, որ Իրանի հոգևոր առաջնորդի հայտարարությունը նախօրոք պատրաստված է եղել, քանի որ հոգևոր գործիչը չի կարող տեղյակ լինել ռազմական ոլորտին առնչվող մանրամասներին: «Դա քաղաքական քայլ է: Իրանը փորձում է թևի տակ պահել Հայաստանը և Ադրբեջանը»,- ասել է Սարգսյանը:
