Չնայած պլաստիկ վիրաբուժությունը Հայաստանում գոյություն ունի ընդամենը 25 տարի, հայ պլաստիկ վիրաբույժները ոչնչով չեն զիջում արտասահմանցի գործընկերներին: Այդ մասին Երևանում կայացած մամլո ասուլիսում հայտնել է Պլաստիկ վերականգնողական և էսթետիկ վիրաբույժների հայկական ասոցիացիայի (AAPRAS) նախագահ Արմեն Հովհաննիսյանը:
Սակայն նա նկատել է, որ չնայած հայաստանյան պլաստիկ վիրաբույժների մասնագիտական պատրաստվածությանը, նրանք դեռ սովորելու շատ բան ունեն իրենց արտասահմանյան գործընկերներից: Ասոցիացիայի նախագահի խոսքով, պլաստիկ վիրաբուժության ոլորտի զարգացումը շատ կարևոր է Հայաստանի համար: «Մենք պետք է ինտեգրվենք այդ ոլորտի գործընթացներին»,- նշել է նա:
Պլաստիկ վիրաբույժների միջազգային ֆեդերացիայի (IPRAS) նախագահ Մարիտա Էյզենման-Քլեյնը իր հերթին նշել է, որ Հայաստանը պլաստիկ վիրաբուժության զարգացման տեսակետից կարող է օրինակ ծառայել տարածաշրջանի մյուս երկրների համար:
