Հունիսի 11-19-ին «Հովեր» երգչախումբը մասնակցել է Իտալիայի «Լա ֆաբրիկա դել Կանտո» 20-րդ հոբելյանական փառատոնին: Փառատոնին մասնակցել են տարբեր մայրցամաքների ներկայացուցիչներ, իսկ «Հովերը» ներկայացրել է Հարավային Եվրոպան:
Երգչախումբը հանդես է եկել Կոմիտասի և արտասահմանյան կոմպոզիտորների ստեղծագործություններով, սակայն ամենամեծ հաջողությունը ունեցել են Կոմիտասի երգերը: Բացի դրանից փառատոնի օրերին «Հովերի» խտասկավառակները գնորդների ամենամեծ պահանջարկն են վայելել: Միլանի «Տեատրո դալ Վերմե» համերգասրահում կայացած համերգին ներկա է գտնվել աշխարհահռչակ մոդելավորող Ռոբերտո Կավալլին: Փառատոնը անցկացվել է իտալական վեց քաղաքներում: «Հովեր» կամերային երգչախումբը ստեղծվել է 1992-ին: Երգչախմբի գլխավոր տնօրենն ու հիմնադիրը Կոմիտասի անվան պետական կոնսերվատորիայի դոցենտ Սոնա Հովհաննիսյանն է: «Հովերը» մասնակցել է բազմաթիվ միջազգային մրցույթների և մեծ ճանաչում ունի ողջ աշխարհում հոգևոր երաժշտությունը գնահատողների շրջանում:
