Գաղտնիք չէ, որ Հայաստանում շինարարությունը որևէ օրենքների չի ենթարկվում: «Շինարարական օբյեկտները մեկը մյուսի կողքին բուսնում են ճիշտ այնպես, ինչպես փոքրիկ երեխան կարող է դասավորել կոպեկները»,- Երևանում կայացած մամլո ասուլիսում հայտնել է Հայաստանի Սպառողների ասոցիացիայի նախագահ Արմեն Պողոսյանը: Եվ չնայած, որ Ասոցիացիայում այդ ոլորտի պրոֆեսիոնալներ չկան, անգամ անզեն աչքով կարելի է տեսնել, թե ինչպես է Բաղրամյանի պողոտայի և Օրբելու փողոցի խաչմերուկում բազմահարկ շենք խոյանում, որի շինարարական աշխատանքներն արգելակում են տրանսպորտի երթևեկությունը:
Ավելին, Արմեն Պողոսյանը կիսվել է, թե ինչպես է ֆորումում հավաքված հայ ճարտարապետների «դավադրության» վկան դարձել, որոնք որոշել են ամբողջությամբ «ոչնչացնել Հանրապետության հրապարակը` մեծ ճարտարապետ Ալեքսանդր Թամանյանի` ամբողջ աշխարհում ճանաչված ստեղծագործությունը` կառավարական շենքի բակում կառուցելով ևս մեկ շենք, ինչպես նաև Ազգային պատկերասրահի հարևանությամբ հյուրանոց հիմնելով»: Ընդ որում, նա ասել է, որ ճարտարապետներն այդ նախագծերի իրականացմանը տրամադրված են հենց հիմա, «քանի որ ապագա սերունդը կարող է թույլ չտալ դա»:
Այս կապակցությամբ Հայաստանի Սպառողների ասոցիացիայի նախագահը հավելել է, որ կառույցը բազմիցս համապատասխան պետգերատեսչություններ է դիմել, սակայն շինարարական նորմերի խախտման հետ կապված իրական արդյունքի չի հասել:
Անդրադառնալով Երևան քաղաքի ընդհանուր տեսքին` Արմեն Պողոսյանը նշել է, որ ներկայիս քաղաքապետի օրոք հայկական մայրաքաղաքն ավելի գեղեցիկ է դարձել. շենքերը նորոգվել են, ընդլայնվում են կանաչ տարածությունները, կանաչ խոտածածկույթներին հետևում են:
