Առաջարկում եմ բոլոր նախարարություններին, ոստիկանությանը, կառավարության բոլոր առընթեր մարմիններին աշխատանքի վերցնել «Չենք լռելու» նախաձեռնության մեկական անդամի: Արդեն որերորդ դեպքն է, որ հենց այդ կազմակերպության անդամներն են բարձրացնում Հայաստանում առկա կարևորագույն խնդիրներ` ապշահար անելով հասարակությանն ու պետական մարմիններին:
Օրերս Վայքի հիվանդանոցում տեղի էր ունեցել ահասարսուռ մի դեպք, որը պարզվում է միակը չէ: Բաժանմունքի վարիչ Մետաքսյա Հովհաննիսյանին զանգել և հայտնել են, որ պետք է գա հիվանդանոց, քանի որ հղի կին են բերել, և ծնունդ ընդունելու ժամանակն է: Մետաքսյան պատասխանել է, թե «բուրդ է չփխում ու կգա հիվանդանոց, երբ գործը ավարտի», միևնույն ժամանակ հրահանգելով «ձգձգել ծնունդը»: Մի քանի ժամ անց միայն «բժշկուհին» բարեհաճել է ժամանել: Ծնունդը անցել է ծանր: Իսկ ծնունդից հետո մանկան կիսամեռ մարմինը Մետաքսյա Հովհաննիսյանը թողել է սեղանին, ասել է. «թող մահանա, հետո կգամ կհերձեմ, տեսնեմ ինչ է պատահել, ինչու թոք չունի»:
Արդյունքում երեխային տեղափոխել են Երևանի Մուրացանի անվ. հիվանդանոց: Այդտեղ երեխային նկարել են, ուղարկել են նկարները Անգլիա, որտեղից պատասխան է եկել, որ գանգի հարվածից արյան զեղում կա ուղեղում ու որևէ բան անել անհնարին է: Երեխան մինչ օրս տանջվում է, և հարազատները չգիտեն որքան կտևի այդ տանջանքը:
Տեղի ունեցած դեպքի մասին, փաստորեն, այդպես էլ ոչ մեկ չէր իմանա, և Հովհաննիսյանն էլ կշարունակեր հանգիստ իր «բուրդը չփխել», եթե երիտասարդ ակտիվիստները չորոշեին բարձրաձայնել այս հարցը ու մամուլն էլ դրան չանդրադառնար: Չեմ կարողանում հասկանալ` այդ ինչ սիստեմով են աշխատում մեր ոստիկանությունն ու առողջապահության նախարարությունը: Մի՞թե նրանք չեն համագործակցում նման հարցերում: Ինչո՞ւ ոստիկանության Վայոց ձորի ու Վայքի բաժանմունքներին չեն տեղեկացրել դեպքի մասին անգամ այն բանից հետո, երբ անգլիացի բժիշկ-փորձագետները եզրակացրել են` «գանգի հարվածից արյան զեղում կա ուղեղում»: Ինչո՞ւ դեռևս գործ հարուցված չէ գանգի վնասվածքը հասցնողին գտնելու համար: Մանավանդ, որ այս նորածնի դեպքը եզակի չէ Վայքում…
Այսպիսով, առաջարկում եմ բացել Կառավարությանն առընթեր «խնդիրների ի հայտ բերման վարչություն» ու որպես պետ էլ նշանակել լռել հրաժարվողներից մեկին:
