Սեպտեմբերի 9-ին ՀՀ սփյուռքի նախարարության նախաձեռնությամբ տեղի ունեցավ կանադահայ գրող Մոնա-Մարիան Մարիկյանի «Հույսը զորավիգ» գրքի շնորհանդեսը: Հիմնվելով պատահաբար գտած հոր օրագրի, ինչպես նաև իր ու ընտանիքի անդամների հիշողությունների վրա` Մոնա-Մարիան Մարիկյանը պատմում է ծնողների աներևակայելի ոդիսականը: Վավերագրությունն արտացոլում է այն սփյուռքհայերի առօրյան, ովքեր 1948-ին, կոմունիստական վարչակարգի օրոք, ներգաղթեցին Սովետական Հայաստան:
Չնայած կրած տառապանքներին, զրկանքներին ու հալածանքներին, անգամ սիբիրյան աքսորին` հայրենադարձները կամքով ու համառությամբ հաղթահարեցին դժվարությունները: Կոմունիստական հայրենիքը նրանց համար կյանքի «համալսարան» դարձավ: ՀՀ սփյուռքի նախարար Հ. Հակոբյանը, անդրադառնալով գրքի բովանդակությանը, նաև շեշտեց, որ նման միջոցառումները կարևոր են, քանի որ դրանք հնարավորություն են տալիս Հայրենիքում ներկայացնել Սփյուռքում բնակվող մեր հայրենակիցների ստեղծագործական հաջողությունները և հակառակը:
«Նման գրքերը հերթական անգամ ցույց են տալիս մեր ժողովրդի դառը պատմությունը, բայց հույս և հավատ ներշնչում, որ ապագան փայլուն է լինելու»,- ավելացրեց տիկին Հակոբյանը:
Գրքի` ֆրանսերենից հայերեն թարգմանիչ Գրիգոր Ջանիկյանը մատնաշնեց, որ այս պատմությունը ոչ թե մեկ հայ ընտանիքի, այլ Ցեղասպանություն ապրած հարյուրավոր հայ ընտանիքների դառը ճակատագրի վառ օրինակ է:
Շնորհանդեսին իր ողջյունի խոսքն էր բերել նաև պատմական գիտությունների դոկտոր, պրոֆեսոր, Իրանում ՀՀ առաջին արտակարգ և լիազոր դեսպան Վահան Բարբուրդյանը:
