«Նարեկ Սարգսյանի բոլոր նախագծերը հակաէկոլոգիական են, հակամշակութային ու հակասոցիալական»,- PanARMENIAN.Net-ի թղթակցի հետ զրույցում, անդրադառնալով Երևանի գլխավոր ճարտարապետի երեկվա մամուլի ասուլիսին, ասել է «Հանուն մարդկության կայուն զարգացման» հասարակական կազմակերպության նախագահ Կարինե Դանիելյանը։

Մամուլի ասուլիսի ժամանակ Նարեկ Սարգսյանը նշել էր, թե իրեն քննադատողներն ու Կարինե Դանիելյանը ստում են` ասելով, որ Հանրապետության հրապարակի թմբուկի այժմյան նախագիծը 3 անգամ գերազանցում է թամանյանականը։ «Ես այդ մասին կարդացել էի ճարտարապետների կարծիքները։ Անգամ եթե նախագծով հիմա ամեն ինչ նորմալ է և Թամանյանի գծածով է, հետո թմբուկը 2-3 անգամ ավելի մեծ կլինի»,- պատասխանեց Կարինե Դանիելյանը` որպես օրինակ մատնանշելով նույն Նարեկ Սարգսյանի նախագծած Հյուսիսային պողոտան. «Կառավարության որոշմամբ այն պետք է Օպերայի շենքից բարձր չլիներ, բայց բոլորս տեսանք, թե ինչ ստացվեց»։

Երեկ լրագրողների հետ հանդիպմանը Նարեկ Սարգսյանն ասել էր` իր նախագծերը չեն ընդունում, որովհետև կա անձնական հաշիվների մաքրման բաղադրիչ։ «Ես պրոֆեսիոնալ ճարտարապետ եմ, սպիտակ ձեռքերով, մեծ ներդրում ունեմ Երևանի կառուցման մեջ։ Այսօրվա Երևանը 10 տարվա վաղեմության Երևանը չէ»,- համեստաբար նշել էր ճարտարապետը։