19.08.2000. ՄԵԴԻԱՄԱՔՍ, ԵՐԵՎԱՆ.Հայաստանի եւ Ուկրաինայի նախագահների` օգոստոսի 18-ին Յալթայում կայացած հանդիպման արդյունքերը ամփոփելիս, Լեոնիդ Կուչման, բնութագրելով հայ-ուկրաինական հարաբերությունների ներկայիս վիճակը, «հաճելի գործոն է անվանել այն փաստը, որ 1999-ից ի վեր ապրանքափոխանակումը երկու պետությունների միջեւ ունի զարգացման դրական միտումներ»:
Ինչպես հաղորդել են ՄԵԴԻԱՄԱՔՍ գործակալությանը Հայաստանում Ուկրաինայի դեսպանատանը, Կուչման հայտնել է նաեւ, որ հոկտեմբերին նախատեսված է Հայաստանի վարչապետի այցը Ուկրաինա, որի ընթացքում կստորագրվի 2000-2009 թթ-ի տնտեսական համագործակցության մասին միջպետական պայմանագիր:
Ուկրաինայի ղեկավարը նշել է, որ հայ-ուկրաինական երկկողմ տնտեսական հարաբերություններում հեռանկարային է հանդիսանում կոոպերատիվ կապերի վերականգնումը նոր սկզբունքների հիման վրա, ինչպես նաեւ ուկրաինական ավանդական ապրանքների վերադարձը հայկական շուկա:
Նա հայտարարել է նաեւ, որ տրանսպորտային նոր մայրուղիները, այդ թվում Իլյիչովսկ-Փոթի միջազգային լաստանավային հաղորդակցումը «լավ հեռանկաներ» կստեղծի հայ-ուկրաինական համագործակցության զարգացման համար: --0--