ԵԱՀԿ ԶԼՄ-ների ազատության հարցերի գծով ներկայացուցիչ Դունյա Միյատովիչը ՀՀ ԱԳ նախարար Էդուարդ Նալբանդյանին հասցեագրված նամակում այսօր մտահոգություն է հայտնել Հայաստանում ԶԼՄ-ների դեմ դատական հայցերի քանակի աճով, որտեղ պատասխանող կողմ են հանդիսանում լրատվական ԶԼՄ-ները, և կոչ է արել իշխանություններին բարեփոխումներ կատարել օրենսդրության մեջ, հայտնում է ԵԱՀԿ մամլո ծառայությունը:
«Ես ողջունեցի զրպարտության համար քրեական պատասխանատվության վերացումը Հայաստանում 2010թ. մայիսին: Ցավոք, այդ ժամանակվանից ի վեր թերթերի դեմ հարուցվել է գրեթե 30 քաղաքացիական հայց զրպարտության ու վիրավորանքի հոդվածներով, որոնցից 11-ը հարուցվել է այս տարի»,-հայտարարել է Միյատովիչը:
Միյատովիչն ընդգծել է, որ փոխհատուցումը պետք է համարժեք լինի պատճառած վնասին:
Նալբանդյանին ուղղված իր նամակում Միյատովիչը նշել է, որ ԵԱՀԿ բյուրոն պատրաստ է հետագայում ևս աջակցել Հայաստանին ԶԼՄ-ների ազատության ապահովման գործում: Որպես օրինակ նա բերել է նոյեմբերի 1-ին Երևանում կազմակերպված սեմինար-թրենինգը:
