Աճի տեմպերի նվազումն այն գործընկեր երկրներում, ուր Հայաստանը ապրանք է արտահանում, հիմք է հանդիսացել Moody's-ի համար երկրի վարկանիշը նվազեցնելու հարցում, գտնում է Forex club-ի վերլուծաբան Միքայել Վերդյանը:
«Այստեղից հարկավոր է հետևություն անել. ուշադրություն դարձնել ապրանքների սպառման շուկաների դիվերսիֆիկացմանը, դա բավականին կարևոր հարց է»,-ասել է նա լրագրողների հետ զրույցում: Նա հավելել է նաև, որ Հայաստանը պետք է վերլուծի ծառացած խնդիրները, հաջորդ տարի տնտեսական աճ ապահովելու համար:
Moody's վարկանիշային գործակալությունը նվազեցրել է Հայաստանի էմիտենտի դեֆոլտի երկարաժամկետ վարկանիշի վերաբերյալ կանխատեսումը արտարժույթով և ազգային արժույթով (Ва2)՝ «կայունից» դեպի «բացասական»:
Ինչպես ասվում է գործակալության պաշտոնական կայքում զետեղված հաղորդագրության մեջ, դա պայմանավորված է նրանով, որ Հայաստանի համար, որն իր ապրանքի 58 տոկոսն արտահանում է Ռուսաստան և Եվրոպա, աճում են ռիսկերը կապված այդ երկրների տնտեսական աճի դանդաղեցման հետ: