Հայաստան կատարած պաշտոնական այցի շրջանակներում Լիբանանի Հանրապետության նախագահ Միշել Սուլեյմանի գլխավորած պատվիրակությունը դեկտեմբերի 10-ին այցելեց Երևանի կոնյակի գործարան: Ըստ նախատեսված ծրագրի` պատվիրակությունը այցելեց Երևանի կոնյակի գործարանի հնացման արտադրամաս, որտեղ ծանոթացավ հայկական Արարատ կոնյակի պատմությանը և արտադրական պրոցեսին: Նախագահը կանգ առավ նաև «Խաղաղության տակառի» մոտ, որը հիմնադրվել է 2001 թվականին ի պատիվ ԵԱՀԿ Մինսկի Խմբի համանախագահների այցի: Տակառում հնացվում է զինադադարի տարին խորհրդանշող 1994թ. կոնյակի սպիրտ: Այն կոչվում է «խաղաղության», քանի որ կբացվի այն ժամանակ, երբ կկարգավորվի ղարաբաղյան հակամարտությունը: Նախագահը իր ստորագրությունը թողեց նաև գործարանի հուշագրքում:
Ըստ ավանդույթի` Երևանի կոնյակի գործարանի հնացման արտադրամասի նախագահական անցուղին համալրվեց Լիբանանի Հանրապետության նախագահ գեներալ Միշել Սուլեյմանի անվանական տակառով: Միշել Սուլեյմանը Երևանի կոնյակի գործարան այցելած 23-րդ նախագահն է, որի պատվին այստեղ կոնյակի սպիրտ է հնացվում:
Երևանի կոնյակի գործարանի տնօրինությունը պարոն Սուլեյմանին նվիրեց նաև հատուկ պատրաստված Արարատ կոնյակ:
