Հայաստանի դեղագործական ոլորտում վերջին տարիներին գրանցվել է արտադրության ծավալների աճ, դեկտեմբերի 23-ին Երևանում կայացած մամուլի ասուլիսում հայտարարել է «Լիկվոր» ընկերության տնօրեն Սերգեյ Մաթևոսյանը: Ընդ որում, նրա խոսքով, 2010թ արտահանման ծավալները աճել են 20 տոկոսով` մինչև 8 մլն դոլար: Հայկական դեղերի իրացման շուկան ներառում է ԱՊՀ երկրները, սակայն հնարավոր է` ներգրավվեն նաև երրորդ երկրներ:

Այս առնչությամբ դեղագործոկան ընկերության տնօրենն ասել է, որ արտահանման վրա հիմնված արտադրական քաղաքականության զարգացման համար կառավարության կողմից մշակված ռազմավարության շրջանակներում, ծրագրվում է մինչև 2015թ արտահանման ծավալները մեծացնել 3-5 անգամ: «Այս ծրագիրը բավականին հավակնոտ է, կառավարությունը պատրաստ է աջակցել մասնավոր հատվածին, որի առաջ խնդիր է դրված զգալիորեն մեծացնել արտադրության ծավալները»,-նշել է նա: Սերգեյ Մաթևոսյանը հավելել է, որ արդեն բազմաթիվ տեղական ընկերություններ ներդրումներ են արել և ավելացրել են իրենց հնարավորությունները: Այնուամենայնիվ, մասնավոր հատվածի առաջ դրված խնդրի լուծման համար, տեղական արտադրողները «մեծ գումարի» կարիք ունեն, կարիք կա հետազոտական աշխատանքների կազմակերպման և սեփական բրենդը համաշխարհային շուկայում ներկայացնելու համար: Ինչպես նաև անհրաժեշտ է ամրացնել արդեն գրավված դիրքերը և փնտրել իրացման նոր շուկաներ:

Սակայն, ինչպես նշել է ընկերության տնօրենը, չլուծված է մնում տեղական շուկայում փոքր մասնաբաժնի հարցը: «Առաջիկա երեք տարիներին մենք մտադիր ենք հայկական շուկայում ավելացնել տեղական արտադրության դեղերի մասնաբաժինը մինչև 20%»,-հայտարարել է նա: