Ֆրանսիայի տարածքում ապրող 600 հազար հայերը, ինչպես Հոլոքոսթի զոհերը, իրավունք ունեն պաշտպանված լինելու, ինչով և պայմանավորված է Հայոց ցեղասպանության ժխտումը քրեականացնող օրինագծի մշակումը: Այդ մասին Facebook-ի իր էջում գրել է ֆրանսիացի պատգամավոր, Ցեղասպանության օրինագծի հեղինակ Վալերի Բուայեն:

Նրա խոսքով, Թուրքիայի պահվածքը «անհարգալից վերաբերմունք է Ֆրանսիայի ինքնիշխանության հանդեպ»: «Դա լուրջ միջամտություն է մեր հանրապետության ներքին գործերին»,- գրում է Բուայեն:

Պատգամավորը նաև ընդգծել է, որ Ֆրանսիան ժողովրդավարության և մարդու իրավունքների պաշտպանության հին ավանդույթներ ունեցող երկիր է, իսկ Թուրքիայի կողմից հնչող սպառնալիքներն ընդամենը արխայիկ մեթոդներ են, որոնք թուրքական իշխանություններին պատիվ չեն բերում:

Ընդ որում Բուայեն հիշեցրել է, որ հենց Թուրքիայում գոյություն ունի օրենք, որը քրեականացնում է Ցեղասպանության ճանաչումը:

Շաբաթվա սկզբից ցեղասպանությունների ժխտումը քրեականցնող օրինագծի հեղինակ Վալերի Բուայեն սպառնալիքներ է ստանում, իսկ նրա կայքը ենթարկվել է հաքերային հարձակման:

Դեկտեմբերի 22-ին Ֆրանսիայի Ազգային ժողովն ընդունել է ցեղասպանությունների, ժխտումը քրեականացնող օրինագիծը, որը ժխտման համար նախատեսում է 1 տարվա ազատազրկում և 45 հազ. եվրոյի չափով տուգանք: