ԵԱՀԿ ղարաբաղյան կարգավորման գծով Մինսկի խմբի համանախագահների հանդիպումները Հայաստանի եւ Ադրբեջանի ԱԳՆ ղեկավարների հետ նախատեսվում են հոկտեմբերի սկզբին Փարիզում` ՅՈՒՆԵՍԿՕ-ի խորհրդաժողովի շրջանակներում: Այդ մասին, ինչպես հաղորդում է «Ինտերֆաքս-Ադրբեջան» գործակալությունը, լրագրողներին է հաղորդել ԵԱՀԿ ՄԽ-ի Ռուսաստանը ներկայացնող նոր համանախագահ Յուրի Մերզլյակովը: Ընդ որում, նա գոհունակություն է հայտնել սեպտեմբերի 15-ին Վիեննայում ՄԽ ամերիկացի եւ ֆրանսիացի իր գործընկերների հետ տեղի ունեցած հանդիպման արդյունքների առնչությամբ: Յու.Մերզլյակովը նաեւ նշել է, որ հայկական մի շարք ԶԼՄ-ներում փոքր-ինչ խեղաթյուրվել են իր խոսքերը հակամարտության կարգավորման շուրջ բանակցություններին Լեռնային Ղարաբաղի ներգրավման անհրաժեշտության մասին: «Ես պարզապես նշել եմ դրա ցանկալիությունը: Սակայն, վերջնական արդյունքում, ամեն ինչ կախված է Հայաստանից եւ Ադրբեջանից, ինչպես նաեւ համանախագահների կարծիքից», - ընդգծել է դիվանագետը: