«Չինաստանն այն պետությունների շարքում չէ, որոնց վրա Արևմուտքը կարող է ճնշում գործադրել»,- հայտնել է իրանագետ Ռուդիկ Յարալյանը Երևանում կայացած մամլո ասուլիսում:
Նրա կարծիքով` Չինաստանը չի միանա հակաիրանական պատժամիջոցներին: «Չինաստանն իր քաղաքական գործողություններով փորձում է ճնշում գործադրել Իրանի վրա, որպեսզի հետագայում էժան նավթ գնի»,- հայտնել է նա:
Ավելի վաղ Չինաստանը մերժել է ԱՄՆ պատժամիջոցները, որոնք կիրառվել են իրանական նավթի հանդեպ: Պաշտոնական Պեկինը դեմ է ըստ էության երկու տարբեր թեմաների կապակցմանը. «Իրանի միջուկային ծրագրի և առևտրի միջև ոչ մի կապ չկա: Չինաստանի կառավարությունն օժանդակում է միջուկային զենք չտարածելու ուղղությամբ ջանքերին: Բայց մենք նաև գտնում ենք, որ Իրանն իրավունք ունի օգտագործելու միջուկային էներգիան խաղաղ նպատակներով»: Այս հայտարարությունը կատարվել է այն ժամանակ, երբ ԱՄՆ ֆինանսների նախարարը այցով գտնվում էր Չինաստանում: