Ֆրանսիայի կառավարության պաշտոնական ներկայացուցիչ և բյուջեի նախարար Վալերի Պեկրեսսը հաղորդել է, որ նախքան հունիսին կայանալիք Ֆրանսիայի հաջորդ խորհրդարանական ընտրութունները Հայոց ցեղասպանության վերաբերյալ նոր բանաձևի ընդունումը գրեթե անհնար է:

Ընդ որում, նա հաղորդել է, որ կառավարությունը կաշխատի օրինագծի նոր տեքստի վրա, որում նկատի կունենան երկրի Սահմանադրական խորհրդի դիտողությունները, հաղորդում է Wall Street Journal-ը:

Ֆրանսիայի Սահմանադրական խորհուրդը 2012թ. փետրվարի 28-ի նիստում ոչ սահմանադրական է ճանաչել ցեղասպանությունների, այդ թվում` Հայոց ցեղասպանության ժխտումը քրեականացնող օրինագիծը, որն ավելի վաղ ընդունվել էր երկրի Սենատի կողմից: Սահմանադրական խորհուրդն իր որոշումը հիմնավորել է նրանով, որ օրենքը «հակասում է Ֆրանսիայի Սահմանադրության 33-րդ հոդվածին խոսքի ազատության մասին»:

Հունվարի 23-ին Ֆրանսիայի Սենատը կողմ է քվեարկել ցեղասպանությունների, այդ թվում` Հայոց ցեղասպանության ժխտումը քրեականացնող օրինագծին: 2011թ. դեկտեմբերի 22-ին օրինագիծն ընդունվել էր Ֆրանսիայի Ազգային ժողովում: Օրինագծի հեղինակը պատգամավոր Վալերի Բուայեն է: Օրինագիծը ժխտման համար նախատեսում է 1 տարվա ազատազրկում և 45 հազ. եվրոյի չափով տուգանք:

Թուրքիան շատ ցավագին ընդունեց այդ օրինագծին Սենատի հավանություն տալը` հայտարարելով Ֆրանսիայի հետ քաղաքական, ռազմական և տնտեսական համագործակցության սառեցման մասին: