Անհրաժտության դեպքում «Բարգավաճ Հայաստան» կուսակցությունը կսատարի մյուս կուսակցություններին, եթե նրանք դիմեն Սահմանադրական դատարան՝ արտակարգ դրության մասին նոր օրենքի վերաբերյալ: «Եթե պետք լինի մենք նույնպես կմիանանք մյուս կուսակցություններին՝ ՍԴ-ին դիմելու հարցում»,-ասել է ԱԺ փոխխոսնակ Սամվել Բալասանյանը: Իր հերթին ԲՀԿ խորհրդարանական խմբակցության անդամ Նաիրա Զոհրաբյանը հավելել է, որ այժմ իրավաբանները ուսումնասիրում են նոր օրենքը և կներկայացնեն իրենց առաջարկները:
ԲՀԿ կոալիցիոն գործընկեր ՀՀԿ խմբակցության ղեկավար Գալուստ Սահակյանն ասել է, որ բոլոր անհրաժեշտ ուղղումներն այդ օրենքում արդեն արվել են և նա չի կարծում, թե հակկավոր են նոր առաջարկներ կամ պետք է դիմել Սահմանադրական դատարան:
Իր հերթին «Օրինաց երկիր» խմբակցության ղեկավար Հեղինե Բիշարյանը նշել է, որ նոր օրենքը համապատասխանում է Սահմանադրությանը: Նա նաև նշել է, որ չի հավատում, թե բանակը իր ժողովրդի դեմ կգնա, «Ես գտնում եմ, որ բանակը գոյություն ունի ժողովրդին պաշտպանելու համար, և չեմ կարծում, որ այն կկիրառվի ժողովրդի դեմ»:
Նշենք, որ Սահմանադրական դատարան դիմելու համար պետք է 27 պատգամավորների համաձայնությունը:
ՀՀ խորհրդարանն ընդունել է «Արտակարգ դրության իրավական ռեժիմի մասին օրինագիծը»: Երկար քաշքշուկից հետո, քվեարկության արդյունքում օրենքն ընդունվեց 67 «կողմ», 1 «դեմ» ձայների հարաբերակցությամբ, իսկ ընդդիմադիր պատգամավորները բոյկոտել են և չեն մասնակցել քվեարկությանը: Քվեարկությունից անմիջապես հետո բոլոր պատգամավորները իշխող կոալիցիայից լքել են դահլիճը՝ առաջացնելով «Ժառանգության» խմբակցության պատգամավորների դժգոհությունը: Նրանք համարում են, որ դա հատուկ է արվել, որպեսզի հնարավոր չլինի համեմատել տաբլոյի ու դահլիճի արդյունքները: Իր հերթին ԱԺ փոխխոսնակ Էդուարդ Շարմազանովը կոչ է արել ընդդիմադիր պատգամավորներին խոսել ոչ թե ենթադրություններով, այլ կոնկրետ անուններ նշելով: Դրանից հետո պատգամավորներն անցել են օրակարգի մյուս հարցերին:
Քվեարկությունից առաջ մթնոլորտը բավականին լարված էր: «Ժառանգության» անդամ Զարուհի Փոստանջյանը որոշել էր կանգնած հետևել մյուս պատգամավորների քվեարկությանը, որպեսզի մեկը մյուսի փոխարեն չքվեարկի: ԱԺ խոսնակը խնդրեց նրան զբաղեցնել իր տեղը , ի պատասխան ՀՅԴ անդամ Վահան Հովհաննիսյանը նշեց, որ պատգամավորն իրավունք ունի գտնվել դահլիճի ցանկացած տեղում: Նիկոյանն իր հերթին հավաստիացրեց, որ քվեարկության վահանակը երկար ժամանակ կգտնվի պատգամավորների տեսադաշտում և նրանք կարող են համեմատել արդյունքները: Հովհաննիսյանն ասել է, դահլիճի պատկերն ավելի հետաքրքիր է, քան տաբլոն:
Հանրապետական Մանվել Բավեյանը տեղից նշել է, որ որոշ պատգամավորներ իրենց համարում են բանտապահներ և դա նրան դուր չի գալիս:
«Արտակարգ դրության իրավական ռեժիմի մասին օրինագիծն» առաջին ընթերցմամբ ընդունվել էր փետրվարի 9-ին, սակայն հետո վարչապետ Տիգրան Սարգսյանի առաջարկով ուղարկվել էր լրամշակման, որից հետո այն դրվեց ԱԺ քննարկմանն արագացված կարգով: Ընդդիմությունն այս օրինագիծը հակասահմանադրական է համարում:
