«Սահմանադրական իրավունք միություն» կուսակցության ղեկավար Հայկ Բաբուխանյանը լրագրողներին բացատրել է իշխող ՀՀԿ-ի հետ միությունը երկու կուսակցությունների հայացքների ընդհանրությամբ և հայտնել, որ ՀՀԿ ընտրացուցակում ՍԻՄ-ը կունենա 3 տեղ: «Այս որոշումը մեզ համար բնական է, քանի որ դեռևս 1989-ից մեր կուսակցությունը համագործակցում է ՀՀԿ հետ: Մեր համագործակցությունն այնքան սերտ է, որ 1992թ ես, լինելով ՍԻՄ փոխնախագահ, գլխավորեցի ՀՀԿ պաշտոնական պարբերականը»,-ընդգծել է նա:
Բաբուխանյանն ընդգծել է, որ երկու կուսակցությունների գաղափարախոսությունները հիմնված են ազգային-պահպանողական գաղափարների վրա, և կուսակցությունը ՀՀ նախագահ և ՀՀԿ առաջնորդ Սերժ Սարգսյանին ընկալում է որպես երկրում ազգային-պահպանողական շարժման առաջնորդ:
Ընդ որում, Բաբուխանյանը հերքել է այն լուրը, որ ՍԻՄ-ը հետագայում կարող է լուծարվել և ընդգրկվել ՀՀԿ կազմում:
