Ռայոլա. Մխիթարյանն ու Պոգբան մինչ «ՄՅ» անցնելն առաջարկներ են ստացել նաև Պրեմիեր լիգայի այլ ակումբներից

PanARMENIAN.Net - «Մանչեսթեր Յունայթեդի» կիսապաշտպաններ Հենրիխ Մխիթարյանն ու Փոլ Պոգբան մինչ անգլիական ակումբ տեղափոխվելը մի շարք առաջարկներ են ստացել Պրեմիեր լիգայի այլ ակումբներից ևս: Այդ մասին The Daily Mail-ին է հայտարարել հայտնի գործակալ Մինո Ռայոլան:

Ըստ գործակալի, երկու խաղացողները կարող էին հայտնվել նաև այլ ակումբներում, քանի որ Ռայոլան քննարկել է «ՄՅ» հետ մրցակցող այլ ակումբների առաջարկները ևս: «Մենք 2 առաջարկ ունեինք Պրեմիեր լիգայից և երկու այլ առաջնությունից»,-ասել է Ռայոլան` անդրադառնալով Պոգբային:

«Փոլը միշտ ասել , որ «Յունայթեդն» իր սրտում է: Էդ Վուդվորթը ցանկանում էր վերադարձնել նրան 1 տարի առաջ, իսկ Մոուրինյոն ցանկանում էր գնել նրան «Չելսիի» համար»,-ասել է նա:

«Մխիթարյանի տրանսֆերն ավելի բարդ էր: Մենք գրեթե պայմանավորվել էինք Պրեմիեր լիգայի այլ ակումբի հետ, սակայն «Բորուսիան» չէր ուզում հրաժարվել նրանից, և ահա հորիզոնում հայտնվեց «Յունայթեդը»,-ասել է Ռայոլան:

Նա նաև անդրադարձել է Զլատան Իբրահիմովիչի տեղափոխմանը «ՄՅ». «Նա իդեալական է «Մանչեսթեր Յունայթեդի» համար: Նա 34 տարեկան է, սակայն, նրա մասին բոլորից շատ են խոսում Պրեմիեր լիգայում»:

Ռայոլան վստահ է, որ իր հաճախորդներին ժամանակ կպահանջվի ադապտացիայի համար, սակայն հետո նրանք կապացուցեն, որ «Յունայթեդը» ճիշտ ընտրություն է կատարել:

Անդրադառնալով Հենրիխ Մխիթարյանին` Ռայոլան ասել է, որ նա Բունդեսլիգայի լավագույն ֆուտբոլիստն էր վերջին 2 խաղաշրջանում: Նա ամուր մենթալիտետ ունի և երբ ապաքինվի, արժեքավոր խաղացող կլինի այդ թիմի համար»,-ասել է Մինո Ռայոլան:

Հուլիսի 6-ին «Մանչեսթեր Յունայթեդը» պաշտոնապես ներկայացրել է Հայաստանի հավաքականի կիսապաշտպան Հենրիխ Մխիթարյանին որպես ակումբի նոր խաղացող: «Հպարտ եմ միանալ «Մանչեսթեր Յունայթեդին», իմ երազանքն իրականացավ: Ոգևորված եմ, որ հանդես եմ գալու նման հարուստ պատմությամբ ակումբում, հույս ունեմ, եր երկար եմ նրա մասը կազմելու: Շնորհակալ եմ Ժոզե Մոուրինյոյին և ակումբին ինձ ընտրելու համար», - ասել է Մխիթարյանը:

«Մանչեսթեր Յունայթեդը» €42 մլն է վճարել Մխիթարյանի համար, ինչպես նաև €8 մլն կվճարի ֆուտբոլիստին` որպես միանվագ բոնուս: Բացի այդ, Մխիթարյանի տարեկան աշխատավարձը «Մանչեսթեր Յունայթեդում» կկազմի €12.5 մլն: Պայմանագիրը կնքվել է 4 տարով: Այդպիսով, Մխիթարյանը շաբաթական մոտ £200 000 կստանա: Մխիթարյանը դարձել է հետխորհրդային տարածքի ամենաթանկարժեք ֆուտբոլիստը: Նախկինում այդ կարգավիճակն ուներ ուկրաինացի հարձակվող Անդրեյ Շևչենկոն, որը 2006-ին տեղափոխվեց անգլիական «Չելսի» իտալական «Միլանից» 40 մլն եվրոյով:

Ընթերցեք նաև. Մխիթարյանը դժգոհ է «Մանչեսթեր Յունայթեդում» իր շուրջ ստեղծված իրավիճակից