ԱՆ․ Դեքսամետազոնով միայն վերակենդանացման բաժանմունքում գտնվողներին են բուժում

PanARMENIAN.Net - Հայաստանում կորոնավիրուսով վարակվածների բուժման ընթացքում դեքսամետազոն օգրտագործվում է, այն անհրաժեշտության դեպքում տրվում է միայն վերակենդանացման բաժանմունքներում գտնվող պացիենտներին՝ բժշկի ցուցմամբ։ Այդ մասին ասել է ԱՆ խոսնակ Ալինա Նիկողոսյանը, տեղեկացնում է Panorama.am-ը։

Ավելի վաղ հայտնի դարձավ, որ կորոնավիրուսի բուժման գործընթացում կարևոր բեկում է արձանագրվել՝ Օքսֆորդի համալսարանում անցկացված փորձարկումները հաստատել են, որ մատչելի դեղամիջոց հանդիսացող դեքսամետազոնը կարող է 33%-ով նվազեցնել մահվան ռիսկը թոքերի արհեստական օդափոխման սարքին միացված պացիենտների համար։

Առողջապահության համաշխարհային կազմակերպությունը ողջունել է կլինիկական փորձարկման նախնական արդյունքները։ԱՀԿ գլխավոր տնօրեն Թեդրոս Ադհան Հեբրեյուսը դա գիտական բեկում է անվանել։

Դեքսամետազոնը կիրառվում է բժշկության մեջ 1960-ականներից և մատչելի դեղամիջոց է բազմաթիվ երկրներում։ Դա ստերոիդային պրեպարատ է, որն օգտագործվում է բորբոքային պրոցեսների, նաև քաղցկեղի որոշ տեսակների բուժման համար։