ՌԴ ԱԳ փոխնախարար Միխայիլ Գալուզինը հայտարարել է, որ Հայաստանի անցումն ԱՄՆ–ի և ՆԱՏՕ–ի «հովանոցի տակ» կփլուզի ՌԴ հետ, ինչպես նաև ՀԱՊԿ շրջանակում, միասնական պաշտպանական տարածքը։ «Անվտանգության ոլորտում Հայաստանի ինքնիշխանության հետագա տարալուծումը և անցումը ԱՄՆ–ի և ՆԱՏՕ–ի «թղթե հովանոցի» տակ ուղղակի անհնարին կդարձնեն ՌԴ հետ միասնական պաշտպանական տարածքի պահպանումը, նաև ՀԱՊԿ շրջանակում»,–ասել է նա, հայտնում է ՌԻԱ Նովոստին։ Նա հավելել է, որ ՌԴ–ն միշտ պատրաստ է քննարկել Երևանին մտահոգող հարցերը։ «ՌԴ–ն իր կողմից բազմիցս և տարբեր մակարդակներով հստակ արտահայտել է իր պատրաստակամությունը՝ Երևանին մտահոգող հարցերը քննարկելու վերաբերյալ»,–ասել է Գալուզինը։ Արարատ Միրզոյանը հունիսի 12–ին ԱԺ–ում հայտարարել է, որ ՀՀ վարչապետ Նիկոլ Փաշինյանը չի ասել, թե Հայաստանը դուրս է գալիս ՀԱՊԿ–ից։ Փաշինյանը նույն օրը խորհրդարանում ակնարկել էր, որ Հայաստանը դուրս կգա ՀԱՊԿ-ից՝ ասելով, թե նախկին իշխանությունները մտել էին «փուչիկ դաշինք», իսկ հետո պարզվել է, որ այն ոչ թե պաշտպանում է Հայաստանը, այլ պատերազմ է պլանավորում է Հայաստանի դեմ։ «Վարչապետն ասել է, որ մենք կորոշենք՝ երբ դուրս կգանք, մենք կորոշենք, բայց հետ չենք գնա՝ ոչ պակաս, ոչ էլ ավելի։ Եթե որևէ մեկը պնդում է, որ ՀՀ վարչապետն ասել է՝ Հայաստանը դուրս է գալիս ՀԱՊԿ-ից, սխալվում է»,- ասել էր Միրզոյանը։