Աշխարհում խոշորագույն ծրագրավորման ուսուցման հայ-ամերիկյան SoloLearn բջջային հարթակը հոկտեմբերի 18-ին հայտարարել է, որ $1.2 մլն ներդրում է ներգրավել հավելվածի տարածման համար:

Valley VC Learn Capital վենչուրային հիմնադրամը միացել է այլ մասնավոր ներդրողների թվին, որոնք արդեն սատարում են SoloLearn-ին:

Valley VC Learn Capital-ը ներկայանում է որպես վենչուրային ընկերություն, որը բացառապես կենտրոնացած է լավագույն և խելացի ուսուցման տեսլականով ձեռներեցների ֆինանսավորման վրա:

SoloLearn-ը բջջային հավելվածների մի ամբողջ շարք է, որն օգտատերին ծրագրավորում է սովորեցնում հատուկ խաղերի միջոցով: Ըստ էության, խաղացողը, ավելի պարզ ասած, աշակերտը կարող է անցնել նոր խաղային մակարդակի միայն յուրացնելով հերթական դասը: Ընթացքում նա միավորներ է հավաքում, որոշակի վարկանիշ է ձեռք բերում, և, ամենակարևորը` ծրագրավորման հմտություններ և գիտելիքներ:

SoloLearn-ը անվճար հասանելի է բոլոր հարթակներում` iOS, Android, Windows Mobile, և սեղանի համակարգիչների համար նախատեսված վեբ տարբերակով:

2015-ի դեկտեմբերին հայ-ամերիկյան SoloLearn ստարտափը ճանաչվել է Սիլիկոնյան հովտի մինչև $10 ֆինանսավորմամբ ամենաարագ զարգացող 10 սկսնակ ընկերություններից մեկը: Հաշվի առնելով հսկայական մրցակցությունը ծրագրավորման ուսուցման շուկայում, SoloLearn-ին հաջողվել է բավականին սեղմ ժամկետում գրեթե անհնարինի հասնել` իր ասպարեզում առաջատար դառնալով աշխարհում:

Այն բաղկացած է 2 բլոկից` ուսուցում և խաղ, որի օգնությամբ օգտատերը կարող է մրցել ընկերների հետ, ծրագրավորման խնդիրներ լուծել: Արդյունքում, նրա մակարդակը, որպես ծրագրավորողի, մշտապես աճում է:

SoloLearn-ը օգտատերեր ունի ամբողջ աշխարհում, որոնց մոտ 40 տոկոսը` ԱՄՆ-ում է:

Ընթերցեք նաև. Ծրագրավորման ուսուցման աշխարհի ամենամեծ հարթակ. Հեղինակները հայերն են