Իրանական հարցը նորից դարձել է գլխավորը միջազգային քաղաքականությունում: Ըստ էության, այն գլխավորն էր վերջին մի քանի տարիներին, սակայն Ֆրանսիայի միացումը ԱՄՆ-ի դիրքորոշմանը կարող է լուրջ ազդեցություն ունենալ տարածաշրջանում իրադարձությունների հետագա զարգացման վրա: «Աշխարհը պետք է պատրաստվի պատերազմի, ինչի պատճառ կարող են դառնալ Իրանի միջուկային նկրտումները: Մենք որոշել ենք, քանի դեռ բանակցություններ են ընթանում, հեռանկարի համար պատժամիջոցների փաթեթ պատրաստել ՄԱԿ-ի պատժամիջոցների շրջանակներից զատ: Դա առաջարկել են գերմանացիները, մեր լավ բարեկամները»,-հայտարարել է Ֆրանսիայի արտգործնախարար Բերնար Քուշները` հավելելով, որ պետք է պատրաստվել վատագույնին, իսկ «վատագույնը պատերազմն է»: