ՌԴ-ի կողմից Հայաստանին 800 մլն դոլարի զենքի առաքման հարցը շարունակում է մնալ ադրբեջանական մամուլի ուշադրության կենտրոնում: Ինչպես պարզվեց, Բաքվի վրա չեն ազդում ոչ ՌԴ ՊՆ, ոչ ՌԴ ԱԳՆ-ի հերքումները: Դե ինչ, դա իրենց գործն է: Այնուամենայնիվ, այս պատմությունից պետք է դասեր քաղեն ինչպես Ռուսաստանը, այնպես էլ Հայաստանը: Ճիշտ է, Կրեմլում պարզամիտ մարդիկ չկան, որոնք անտարակույս կհավատան Իլհամ Ալիեւի խոսքերին «Ադրբեջանի համար այդչափ կարեւոր Ռուսաստանի հետ բարեկամական հարաբերությունների մասին», բայց այնուամենայնիվ...

2008թ. դարձավ Հարավային Կովկասի վերաձեւման տարի: Հարավային Օսեթիայի դեմ Վրաստանի սանձազերծած «հնգօրյա պատերազմից» հետո պարզ դարձավ, որ տարածաշրջանում նոր բաժանարար գծեր են նախանշվում: Հավանաբար, ինքն էլ չցանկանալով դա, Վրաստանի նախագահը «թագավորական» նվեր մատուցեց ՌԴ-ին, որը վաղուց էր հարմար առիթի սպասում ԱՄՆ-ից ռեվանշ վերցնելու համար` Կովկասի հակամարտությունների հանգուցալուծման մեջ չափազանց խորը ներթափանցման համար: Արդյունքում ավելի մեծ խառնաշփոթ ստացվեց, որտեղ նույնիսկ «ամենահմուտ» պետությունները չկարողացան որեւէ բան որսալ: