Թուրքիան բոլոր ուղղություններով քարոզարշավ է սկսել Հայոց ցեղասպանության ճանաչման դեմ: Գործի են դրվում արդեն բոլոր փորձված միջոցները` շանտաժը, կաշառքը, սպառնալիքները: Սակայն նաեւ մի նոր բան է երեւան եկել: Վաշինգտոնի CREW կազմակերպությունը բողոքներ է փոխանցել ԱՄՆ Արդարադատության նախարարություն եւ այլ կառույցներ` նախընտրական քարոզարշավի ժամանակ եւ լոբբիացման ընթացքում Ամերիկայի Հայ Դատի Հանձնաժողովի կողմից խախտումներ կատարելու վերաբերյալ: CREW-ի կարծիքով, ANCA-ն չի պահպանում Այլազգի գործակալների գրանցման մասին Օրենքը (Foreign Agents Registration Act) եւ խուսափում է Լոբբիստական գործունեության բացահայտման մասին Օրենքից (Lobbying Disclosure Act):

Համաշխարհային ֆինանսական ճգնաժամի ազդեցությունը ընդհանրապես Հայաստանի տնտեսության եւ քաղաքացիների սոցիալական վիճակի վրա արդեն զգալի է, հատկապես, բնակչության զբաղվածության հարցում: Այսօր արդեն աշխատանքի տեղավորման մի շարք առաջատար գործակալություններ արդեն սկսել են ահազանգել. աճող պահանջարկին զուգընթաց աշխատանքային շուկայում նկատվում է առաջարկի գրեթե կրկնակի կրճատում:

2008թ. դարձավ Հարավային Կովկասի վերաձեւման տարի: Հարավային Օսեթիայի դեմ Վրաստանի սանձազերծած «հնգօրյա պատերազմից» հետո պարզ դարձավ, որ տարածաշրջանում նոր բաժանարար գծեր են նախանշվում: Հավանաբար, ինքն էլ չցանկանալով դա, Վրաստանի նախագահը «թագավորական» նվեր մատուցեց ՌԴ-ին, որը վաղուց էր հարմար առիթի սպասում ԱՄՆ-ից ռեվանշ վերցնելու համար` Կովկասի հակամարտությունների հանգուցալուծման մեջ չափազանց խորը ներթափանցման համար: Արդյունքում ավելի մեծ խառնաշփոթ ստացվեց, որտեղ նույնիսկ «ամենահմուտ» պետությունները չկարողացան որեւէ բան որսալ: