Ըստ ՀՀ կառավարության նախագծի` Ռուսաստանի Տուլայի մարզում Մոսկվա-Երևան ուղևորատար ավտոբուսի վթարի հետևանքով զոհվածների ընտանիքներին կտրամադրվի 1 մլն 500-հազարական դրամ: Հայաստանի և Ռուսաստանի հիվանդանոցներում բուժումը շարունակող 14 վիրավորին կհատկացվի 700-հազարական դրամ:
Ավտոբուսի մյուս բոլոր ուղևորներին կտրամադրվի 500-հազարական դրամ:
Որոշման նախագիծը նոյեմբերի 9-ին ՀՀ տրանսպորտի և կապի նախարարության նիստում ներկայացրել է նախարար Գագիկ Բեգլարյանը: Որոշման նախագիծը Կառավարության հաստատմանը կներկայացվի առաջիկա նիստին:
Նոյեմբերի 3-ին տեղի ունեցած Մոսկվայից Երևան ուղևորվով ավտոբուսի կողաշրջման հետևանքով զոհվել է 9, վիրավորվել՝ 48 ուղևոր: Բոլոր զոհերն ու վիրավորները ՀՀ քաղաքացիներ են: ՃՏՊ պատճառները դեռ պարզվում են: Հիմնական վարկածներից մեկը տեխնիկական անսարքությունն է, դիտարկվում է նաև մարդկային գործոնի վարկածը: Հայտնի է, որ 44-ամյա վարորդը 2015-ի ամռանը վարչական պատասխանատվության է ենթարկվել անսարք ավտոբուս վարելու համար:
Հայաստանի Հանրապետության 44-ամյա քաղաքացու նկատմամբ հարուցվել է քրգործ ՌԴ Քրեական օրենսգրքի 234-րդ հոդվածի (Երկու և ավելի մարդկանց մահվան հանգեցրած երթևեկության և մեքենաների շահագործման կանոնների խախտում) հոդվածով:
Կարդացեք նաև՝ Մոսկվայում կրկին անսարք ավտոբուս է կանգնեցվել, որով Երևան էր մեկնելու 50 մարդ
ՀՀ տրանսպորտի փոխնախարար. Ուղևորափոխադրումների ոլորտում վերահսկողությունը կուժեղացվի