Եվրախորհրդի Խորհրդարանական Վեհաժողովի մոնիտորինգի հանձնաժողովի Հայաստանի հարցերով զեկուցող Եժի Յասկերնյան իր զեկույցի պատրաստման համար Երեւանում հանդիպել է երկրի իշխանությունների, քաղաքական, այդ թվում նաեւ ընդդիմադիր կուսակցությունների ներկայացուցիչների հետ:

Տեղեկացված արեւմտյան դիվանագետի կարծիքով, ստորագրման պատրաստ համաձայնագիրը ոչ միայն չէր համապատասխանում Ադրբեջանի շահերին, այլ նաեւ ձեռնտու չէր անձամբ Հ.Ալիեւին, որպես քաղաքական գործչի:

Հայաստանի նախագահին կից Անվտանգության խորհրդի քարտուղար, պաշտպանության նախարար Սերժ Սարգսյանը եւ Երեւանում ԵԱՀԿ առաքելության ղեկավար Վլադիմիր Պրյախինը նախօրեին հուշագիր են ստորագրել խորհրդային զորքերի կողմից հանրապետության տարածքում թողած «Մելանժ» տիպի ռակետային հեղուկ վառելիքի ոչնչացման մասին:

«Հանրապետություն» ընդդիմադիր կուսակցության քաղխորհրդի անդամ, Հայաստանի պաշտպանության նախկին նախարար Վաղարշակ Հարությունյանի նկատմամբ փոխվել է խափանման միջոցը` նա ազատ է արձակվել բնակության վայրից չբացակայելու ստորագրությամբ:

Բաքվում հրապարակվող «Էխո» թերթը սադրիչ տեղեկություն է տարածել այն մասին, թե Ստեփանակերտում ընդդիմությունը ցույցեր է անում` պահանջելով վերադարձնել Ղարաբաղը Ադրբեջանի կազմ: Համաձայն հաղորդագրության, նման ցույցերից մեկի ժամանակ ԼՂՀ-ի դրոշի հետ մեկտեղ ցուցարարները բարձրացրել են նաեւ Ադրբեջանի դրոշը: Այս զառանցանքային հայտարարությունը չի հաստատել եւ ոչ մի այլ աղբյուր: Ստեփանակերտի մեր գործընկերները հայտնում են, որ Ղարաբաղում ոչ մի ցույց չի եղել: Լիովին ակնհայտ է, որ մենք գործ ունենք հերթական կեղծիքի հետ: