Առաքել Միրզոյան.Դեռ 5 տարեկանում ես 20 կգ ծանրաձող բարձրացրեցի ու իմ ողջ կյանքը նվիրեցի ծանրամարտին18 մայիսի 2010 PanARMENIAN.Net - Հայ մարզիկ Առաքել Միրզոյանը 20 տարեկանում արդեն հասցրել էր դառնալ Եվրոպայի չեմպիոն և աշխարհի առաջնության 69 կգ քաշային կարգում` արծաթե մեդալակիր: 2010 թ. նա փոխեց իր քաշային կարգը և այժմ հանդես է գալիս 77 կգ ք/կ-ում: Այս տարի նա ջանադրաբար մարզվում է և պատրաստվում է աշխարհի առաջնությանը, որն անցնելու է Անթալիայում (Թուրքիա): Իր սպասումների, մարզական ծրագրերի և նախապատրաստական աշխատանքների մասին է պատմում Առաքել Միրզոյանը PanARMENIAN.Net-ին տված հարցազրույցում: Դուք փոխել եք քաշային կարգը` 69կգ-ից անցնելով 77կգ քաշային կարգ, և որոշել եք բաց թողնել Եվրոպայի առաջնությունն ու միանգամից մասնակցել աշխարհի առաջնությանը: Ինչո՞ւ Դուք և Ձեր մարզիչը (Միրզոյանի մարզիչն իր հայրն է` օլիմպիական չեմպիոն Օգսեն Միրզոյանը) այդպիսի որոշում ընդունեցիք: 69 կգ քաշային կարգում ես երկու տարի եմ հանդես եկել, իսկ հիմա ժամանակն էր կարգը փոխելու, քանի որ միշտ այս քաշային կարգում բարդություններ եմ ունեցել. ստիպված եմ եղել նիհարել և շատ ուժ եմ կորցրել: Քաշային կարգս փոխելուց հետո առաջընթաց եմ նկատում: Կարծում եմ, եթե Եվրոպայի առաջնությանը մասնակցեի, կարող էի զբաղեցնել 1-ին կամ 2-րդ տեղը, սակայն մարզումների ժամանակ հորս հետ որոշեցինք, որ կարող եմ բաց թողնել այդ առաջնությունը: Անցյալ տարի ապրիլի 7-ին ես դարձա Եվրոպայի մրցանակակիր, իսկ հիմա իմ խնդիրը աշխարհի մրցանակակրի տիտղոսը նվաճելն է: Առաքել, Դուք հավաքականից դուրս` առանձին եք մարզվում: Ինչո՞վ է դա պայմանավորված: Երբ ես սկսեցի մեծ սպորտով զբաղվել` սկսեցի միայնակ մարզվել, հավաքականից առանձին: Ես կարծում եմ, որ այդպես կարող եմ մեծ հաջողության հասնել: Ինձ իմ հայրն է մարզում, նա օլիմպիական չեմպիոն է` Օգսեն Միրզոյանը: Ժամանակի ընթացքում ես վարժվեցի այդպիսի մարզումներին; Չեմպիոնի ոսկուն արժանանալու ուղին երկար է ու դժվարին: Ի՞նչ ծրագրեր ունեք աշխարհի առաջնությունից առաջ: Որոշ ժամանակ մարզվում էի Ծաղկաձորում: Հիմա մարզվում եմ տանը: Մայիսին նախապատրաստական աշխատանքները կշարունակեմ կամ Թեոդոսիայումՙ Ուկրաինա: Ես ամեն ինչ անելու եմ, որ սեպտեմբերի 18-ին` Անթալիայում տեղի ունենալիք աշխարհի առաջնությանը պատրաստ լինեմ: Հիմա թեթև մարզումներ եմ անցկացնում, իսկ նախապատրաստական դժվարին փուլը սկսվելու է մայիսի 10-ից: Անցյալ տարի աշխարհի առաջնությունում ես արծաթե մեդալ էի նվաճել, այս տարի նույնպես ուզում եմ անպայման իմ երազանքն իրականացնել և դառնալ աշխարհի մրցանակակիր: Դուք ընտանեկան հիանալի զույգ եք` հայրդ մարզիչն է, իսկ Դուք նրա սանը: Ի՞նչ զգացողություն ունեք, երբ քո մարզիչը ոչ միայն հայրդ է, այլ նաև օլիմպիական չեմպիոն: Չեմ ժխտի, որ դա և հեշտ է, և, միաժամանակ, դժվար: Ես աշխատում եմ նրա բոլոր հրահանգները կատարել: Ոչ բոլորին է այդպիսի բախտ վիճակվում: Նա բոլոր մանրուքներին ուշադրություն է դարձնում և շատ խիստ է: Ես չեմ ուզում, որ նրա ջանքերը զուր անցնեն, քանի որ իմ պարտությունը նաև նրա պարտությունն է: Արդյոք Դուք կուռք ունեք ծանրամարտում, ո՞ւմ եք կերպավորում կամ ո՞ւմ եք ձգտում նմանվել; Մեր տանը հորս ընկերների նկարներն են` օլիմպիական չեմպիոն Յուրի Վարդանյանի, Յուրի Սարգսյանի, ու ես մանկուց մտածել եմ այն ծանրությունների մասին, որը նրանք բարձրացրել են: Ես ցանկանում էի նրանց նմանվել, և ես գիտեի, որ պետք է շատ մարզվեմ ու պայքարեմ այդպիսի արդյունքների հասնելու համար; Ես շատ երջանիկ եմ, որ օրերս Յուրի Վարդանյանը եկել էր իմ մարզումները դիտելու, ինձ համար դա մեծ պատիվ էր: Ծանրամարտը սպորտի թեթև տեսակներից չէ: Այդ մարզաձևով զբաղվելու համար պետք է կամքի ուժ, համառություն ունենալ, կազմակերպված լինել: Ի՞նչ հատկանիշ պետք է ունենա ծանրորդը: Յուրաքանչյուր մարզիկ, առաջին հերթին, պետք է բարոյապես պատրաստ լինի, առանց դրա անհնար է հաջողության հասնել: Ես այդ ամենը սեփական փորձից գիտեմ: Լինում է այնպիսի պահ, երբ մրցումների ժամանակ ծանրաձողը չես կարողանում բարձրացնել, թեև այդ քաշը շատ անգամներ ես բարձրացրել: Մարզիկի համար շատ կարևոր է լինել կարգապահ, սնվել ու քնել ժամանակին: Ալկոհոլն ու ծխախոտը արհեստավարժ մարզիկի կյանքում տեղ չունեն: Ինչո՞ւ որոշեցիք ծանրորդ դառնալ, ինչպե՞ս կատարեցիք առաջին քայլերը ծանրամարտում: Ես դեռևս 5 տարեկանում 20 կգ ծանրաձող եմ բարձրացրել, ինքս էլ չգիտեմ, թե ինչպես դա ստացվեց; Այդ ժամանակից էլ որոշեցի զբաղվել այդ մարզաձևով ու կյանքս նվիրել դրան, քանի որ գիտեի, որ այն ինձ փառք, ճանաչում ու հարգանք է բերելու: Սպորտը մարդուն ճիշտ ուղու վրա է կանգնեցնում:Հասմիկ Բաբայան / PanARMENIAN News | Team-ի ինտերնետը հասանելի է մետրոյում Team-ի 4G ինտերնետը հնարավորություն կտա մետրոյի ուղևորներին անխափան օգտվել հավելվածներից, դիտել տեսանյութե Կիրանցի ղեկավար. Փաշինյանն ասել է՝ Ադրբեջանի վերահսկողության տակ գտնվող մեր հողերը վերադարձնելու ենք Տավուշի 4 գյուղ հանձնելու Ադրբեջանի պահանջի վերաբերյալ Կիրանցի գյուղապետն ասել է, որ դրանք ադրբեջանական գյուղեր են Բայրամովը Բոնոյին է ներկայացրել Բաքվի «ակնկալիքները ՀՀ հետ խաղաղ գործընթացից» Նրանք քննարկել են տարածաշրջանում տիրող իրավիճակը Փաշինյան․ ՀՀ այն ուրվագիծը, որ ցույց եմ տվել ասուլիսին, ցուցադրել եմ նաև Տավուշում «Հարցեր կային, որ տեղում դրանց սրությունը, այսպես ասած, ավելի էմոցիոնալ ու ավելի գործնական զգացի»,-ասել է նա |