Դավիթ Սաֆարյանը մրցավարական սխալի պատճառով դուրս մնաց 1/4 եզրափակչից

12 օգոստոսի 2012 - 12:58 AMT

PanARMENIAN.Net - Այսօր Լոնդոնի Օլիմպիական խաղերում տեղի է ունենում մեդալների վերջին հավաքածուների խաղարկումը:

Հայաստանի վերջին ներկայացուցիչն ազատ ոճի ըմբիշ Դավիթ Սաֆարյանն է, որը հանդես է գալիս մինչև 66 կգ քաշային կարգում:

Սաֆարյանը 1/8 եզրափակչում պետք է հանդիպեր եգիպտացի Օմար Ահմեդին: Սակայն նրա մրցակիցը հրաժարվեց պայքարից, և մրցավարը ի նշան հաղթանակի բարձրացրեց Սաֆարյանի ձեռքը:

Այսպիսով, 1/4 եզրափակչում հայ մարզիկի մրցակիցը ղազախ Ակժուրեկ Թանաթարովն էր: Առաջին մրցափուլում մրցակիցները վաստակեցին երկուական միավոր, սակայն Հայաստանի հավաքականի գլխավոր մարզիչ Արայիկ Բաղդադյանը բողոքարկեց մրցավարական ելույթը: Մրցավարները գտան, որ սխալ է որոշումը և մեկ միավոր տվեցին ղազախ մարզիկին:

Երկրորդում Սաֆարյանն էլ ակտիվ սկսեց գործել, կատարեց մի քանի գեղեցիկ գլորումներ և հաղթեց 4:1 հաշվով: Ամեն ինչ որոշվեց լրացուցիչ՝ երրորդ մրցափուլում: Այստեղ Սաֆարյանը հաղթում էր երկու-մեկ հաշվով, սակայն ղազախները բողաքարկեցին: Չնայած, Թանաթարովը ընդամենը մեկ գլորում էր կատարել, նրան ևս մեկ միավոր տվեցին մրցավարները, ու Սաֆարյանը դուրս մնաց հետագա պայքարից;

Հայաստանի հավաքականից Օլիմպիական արծաթե մեդալակիր է դարձել հունահռոմեական ըմբիշ Արսեն Ջուլֆալակյանը, իսկ ծանրորդ Հռիփսիմե Խուրշուդյանն ու հունահռոմեական ըմբիշ Արթուր Ալեքսանյանը դարձել են բրոնզե մեդալակիրներ: