Սիմոնյան. Անընդունելի է, երբ եկեղեցականը, եկեղեցին զբաղվում են քաղաքականությամբ՝ քաղաքականությունն առևտուր է

PanARMENIAN.Net - ԱԺ նախագահ Ալեն Սիմոնյանը, անդրադառնալով «Տավուշը հանուն հայրենիքի» շարժմանը, որն առաջնորդում է Տավուշի թեմի առաջնորդ Բագրատ սրբազանը, լրագրողների հետ ճեպազրույցի ժամանակ ասել է, որ իր համար անընդունելի է, որ եկեղեցականն ու եկեղեցին զբաղվում են քաղաքականությամբ։

«Եկեղեցին չպետք է զբաղվի քաղաքականությամբ։ Անտարբեր նայելը և քաղաքական գործունեությամբ զբաղվելը տարբեր բաներ են: Աստվածաշնչի մեջ էլ է ասված՝ իմ հոր տունը մի սարքեք առևտրի տեղ, քաղաքականությունն առևտուր է»,–ասել է ԱԺ խոսնակը, հայտնում է Factor.am-ը։

Նա նշել է, որ միջազգային գործընկերների հետ բանակցելը ևս քաղաքական առևտրի դրսևորում է։

«Այսինքն՝ ձեզ թվում է՝ երբ մենք միջազգային գործընկերների հետ բանակցում ենք, քաղաքական առևտրով չենք զբաղվո՞ւմ: Քաղաքականությունը առևտուր է: Առևտուր է, երբ կոալիցիա ես ստեղծում, երբ ցուցակ ես կազմում, և եկեղեցին, իր գործը թողած, զբաղվում է առևտրով»,- նշել է խորհրդարանի խոսնակը։

«Տավուշը հանուն հայրենիքի» շարժման ղեկավար Բագրատ արքեպիսկոպոս Գալստանյանն ավելի վաղ ուղերձ էր հղել Կիրանցում տեղի ունեցող իրադարձությունների վերաբերյալ ու շեշտել` ՀՀ իշխանությունը պետք է հեռանա։ Նա հանդիպումներ է ունենում տարբեր քաղուժերի հետ՝ խորհրդակցելով վարչապետին անվստահություն հայտնելու հարցի շուրջ, որի համար իմպիչմենտ առաջարկող ուժը պետք է ներկայացնի վարչապետի իր թեկնածուին։ Շատերը կարծում են, որ ամենահամար թեկնածուն անցումային շրջանի համար կարող է լինել Բագրատ սրբազանը։