Անցյալ շաբաթ Հայաստանի կառավարությունը նիստի ժամանակ քննարկել է պետկառույցներում գրասենյակային աշխատանքի համար Unicode համակարգում որպես պարտադիր պայման հայկական տառատեսակների օգտագործումը, ինչպես նաև որոշ պետական կայքերի հայերեն տեքստերի կոդավորումների թարգմանությունը: Հայաստանի վարչապետ Տիգրան Սարգսյանը նշել է, որ պետկառույցների որոշ կայքեր անհասանելի են լինում ընթերցանության համար օգտագործվող կոդավորումների պատճառով:

Հայ-ռուսական մշակութային կապերը խորացման ներուժ ունեն: Այդ մասին հունիսի 12-ին հայտնել է ՀՀ Ազգային անվտանգության խորհրդի (ԱԱԽ) քարտուղար Արթուր Բաղդասարյանը «Եվրասիա» ակադեմիայի նախագահ Օլեգ Պոպցովի, Մոսկվայի հեռուստատեսային և ռադիոհեռարձակման ինստիտուտի ռեկտոր Վասիլի Կորելսկիի, «ՏՎՑ» հեռուստաընկերության քաղաքական տեսաբան Լեոնիդ Իոֆեի և Հայաստանի հեռուստատեսության և ռադիոյի ակադեմիայի ռեկտոր Համլետ Ղուշչյանի հետ հանդիպմանը: «Մեզ համար շատ կարևոր են Հայաստանի և Ռուսաստանի միջև մշակութային կապերի առավել խորացմանն ուղղված հայ և ռուս մտավորականների ջանքերը»,- ընդգծել է Արթուր Բաղդասարյանը: Վերջին շաբաթվա իրադարձությունները ցույց են տալիս, որ այդ հարաբերությունների զարգացումը շատ բարձր մակարդակում է:

Բռնցքամարտ. Մոսկվայում հունիսի 8-ին բռնցքամարտի Եվրոպայի առաջնությունում կայացել են քառորդ եզրափակչի մենամարտերը: Հայաստանի հավաքականը ներկայացնում են 10 բռնցքամարտիկներ, որոնցից 3-ը` Արթուր Խաչատրյանը (81 ք/կ), Հովհաննես Դանիելյանը (48ք/կ) և Հրաչիկ Ջավախյանը (64ք/կ) դուրս են եկել կիսաեզրափակիչ: Նրանք արդեն բրոնզե մեդալներ ունեն, իսկ եզրափակիչ դուրս գալու համար հունիսի 11-ին կմրցեն կիսաեզրափակչի մարտերում: