ՀՀ գերատեսչությունները ստացել են Մաքսային միությանն անդամակցելու համար անհրաժեշտ օրենսդրական փաթեթը

PanARMENIAN.Net - Արդարադատության նախարարությունը և համապատասխան գերատեսչությունները ստացել են այն օրենսդրական փաթեթը, որն անհրաժեշտ է Մաքսային միությանն անդամակցելու համար ՀՀ օրենսդրությունը համապատասխանեցնելուն: Այսօր լրագրողների հետ հանդիպմանը հայտարարել է ԱԺ տնտեսական հարցերի մշտական հանձնաժողովի նախագահ Վարդան Այվազյանը՝ նկարագրելով այն առավելությունները, որ կունենա Հայաստանը՝ դառնալով Մաքսային միության անդամ:

«Հայաստանը այդ անդամ երկրների հետ առևտուր պետք է անի, ոնց որ ստեղի գործարանը մյուս գործարանի հետ՝ առանց որևէ բանի, միայն փաստաթղթային ձևակերպումներով, այլ երկրների հետ կիրառելու է, ոնց որ Բելառուսում է կիրառվում, Ղազախստանում, նույն ձևի, մաքսային մեկ միասնական կառավարման մոդել: Այսինքն՝ սա միասնական խնդիր է լուծում»,– ասաց «Հանրապետական» խմբակցության պատգամավորը:

Միևնույն ժամանակ ԱԺ տնտեսական հանձնաժողովի նախագահը կասկածում է, որ 2014 –ի ընթացքում Հայաստանը կհասցնի նախապատրաստվել Մաքսային միությանը անդամակցությանը, հայտնում է Tert.am-ը:

ՄՄ-ին Հայաստանի անդամակցությունը նախապատրաստելու նպատակով սեպտեմբերի 25-ին ստեղծվել է համակարգող հանձնաժողով, որի աշխատանքը ղեկավարելու է ՀՀ վարչապետ Տիգրան Սարգսյանը:

ԵՄ վերաբերմունքը Հայաստանի հանդեպ մի փոքր սառեց, երբ սեպտեմբերի 3-ին Ռուսաստանի նախագահ Վլադիմիր Պուտինի հետ հանդիպման ավարտին Հայաստանի նախագահ Սերժ Սարգսյանը հայտարարեց Մաքսային միությանը միանալու և հետագայում Եվրասիական միության ձևավորմանը մասնակցելու Հայաստանի մտադրության մասին: Հայաստանի այս որոշումը քննադատության ենթարկվեց եվրոպական կառույցների ու փորձագիտական շրջանակների կողմից, որոնք հայտարարեցին, որ Հայաստանը գործնականում խզեց բանակցությունները Եվրոպայի հետ, ինչն անհնար է դարձնում ԵՄ հետ Ասոցացման համաձայնագրի նախաստորագրումը այս տարվա նոյեմբերին Վիլնյուսում՝ ԵՄ և Արևելյան գործընկերության ղեկավարների գագաթաժողովում: Այնուհետև Եվրահանձնաժողովը հանդես եկավ հայտարարությամբ, համաձայն որի Ասոցացման մասին համաձայնագիրը և Խորը ու համապարփակ ազատ առևտրի համաձայնագիրը (DCFTA) կարող են համատեղելի լինել ԱՊՀ անդամ երկրների հետ տնտեսական համագործակցության հետ:

Անցած շաբաթ Եվրամիության ղեկավարները նաև դատապարտեցին այն ճնշումը, որն, ըստ իրենց, Մոսկվան գործադրում է Ուկրաինայի և հետխորհրդային տարածքի մյուս երկրների վրա, որոնք փորձում են ընդլայնել կապերը ԵՄ հետ: