Քաղաքագետ. Թուրքիայում ընտրությունների արդյունքները վկայում են Էրդողանի քաղաքականության տապալման մասին

 15 հունիսի 2015 - 18:31 AMT

PanARMENIAN.Net - Թուրքիայում անցկացված ընտրությունների արդյունքները ցույց տվեցին, որ Թուրքիայի նախագահ Ռեջեփ Էրդողանի քաղաքականությունն անհաջողություն է կրել: Այս մասին հունիսի 15-ին լրագրողների հետ հանդիպմանն ասել է Կովկասի ինստիտուտի տնօրեն, քաղաքագետ Ալեքսանդր Իսկանդարյանը՝ հավելելով, որ Էրդողանը պլան ուներ փոխել Սահմանադրությունը, որպեսզի կառավարեր առաջիկա 10 տարին և դրանից հետո նույնպես:

«Էրդողանը որոշակի ծրագիր ուներ, ըստ որի` Թուրքիայի 550–տեղանոց խորհրդարանում պետք է 367 տեղ ստանար, իսկ 367 պատգամավորը կարող են փոխել սահմանադրությունն առանց հանրաքվեի։ Այդ ծրագիրը ձախողվեց, քանի որ նրանք հավաքեցին 258 քվե, ինչն աղետ է ոչ այնքան կուսակցության, որքան Էրդողանի համար»,– ասել է փորձագետը, , մեջբերում է «Նովոստի Արմենիան»:

Հունիսի 7-ին Թուրքիայում տեղի ունեցան խորհրդարանական ընտրություններ: Վերջին 12 տարիներին իշխող դիրքը պահպանող Արդարության և զարգացման կուսակցությունը խորհրդարանում ստացել է 258 տեղ 550-ից, ինչի հետևանքով այլևս խորհրդարանական մեծամասնություն չի կազմում և չի կարող միայնակ ձևավորել կառավարությունը։Կառավարություն ձևավորելու համար նա ստիպված կլինի կոալիցիա կազմել ընդդիմադիր կուսակցություններից մեկի հետ: 10-տոկոսանոց արգելքը հաղթահարել է նրանցից 3-ը` Ժողովրդա-հանրապետական կուսակցությունը (25,1 տոկոս), Ազգայնական շարժման կուսակցությունը (16,4 տոկոս) և քրդամետ Ժողովրա-դեմոկրատական կուսակցությունը (12,8 տոկոս), որը առաջին անգամ է մասնակցել ընտրություններին:

Իսկանդարյանն ընգծել է, որ Էրդողանն այն քաղաքականության շարժիչն է, որն անցկացվել է Թուրքիայում, այդ թվում` հայկական հարցի նկատմամբ:

Խորհրդարանական ընտրությունների ֆոնին Թուրքիայի կառավարությունը հրաժարական է տվել: