Մկրտչյանը շախմատի ԵԱ-ի առաջատարից հետ է մնում 1 միավորով

6 հունիսի 2016 - 10:11 AMT

PanARMENIAN.Net - Հայաստանի կանանց շախմատի հավաքականի անդամներ Լիլիթ Մկրտչյանն ու Մարիա Կուրսովան շարունակում են պայքարը Եվրոպայի չեմպիոնի կոչման համար:

Ռումինիայում ընթացող աշխարհամասի անհատական առաջնությունում հունիսի 5-ին կայացան 9-րդ տուրի պարտիաները:

Մկրտչյանն ու Կուրսովան հաղթել են իրենց մրցակիցներին և շարունակում են հետապնդել առաջատարներին: Մկրտչյանը սևերով պարտության է մատնել իսրայելցի Յուլյա Շվայգերին, վաստակել 6,5 միավոր և այժմ ընդամենը մեկ միավորով է հետ մնում մրցաշարի միանձնյա առաջատար Աննա Ուշենինայից և զբաղեցնում է 4-րդ տեղը:

Մարիա Կուրսովան սպիտակներով վստահ հաղթել է ռումինուհի Կորինա-Իզաբելա Պեպտանին և իր միավորների քանակը հասցրել 6-ի: Նա առայժմ բաժանում է 7-19-րդ տեղերը, գրում է A1+-ը:

Իսկ ահա մեր մյուս երկու ներկայացուցիչը՝ Լիլիթ Գալոյանն ու Մարիա Գևորգյանը, այս տուրում անհաջող հանդես եկան և հերթական պարտությունը կրեցին: Նրանք նահանջեցին 84-92-րդ տեղեր:

Շախմատի կանանց Եվրոպայի անհատական առաջնությունն այս տարի անցկացվում է Ռումինիայի Մայամա քաղաքում: Այն մեկնարկել է մայիսի 27-ին և կեզրափակվի հունիսի 8-ին:

Հղումներ թեմայով.

Լիլիթ Մկրտչյանն ու Մարիա Կուրսովան հաղթանակ տարան.